काठमाडौँ । च्याम्पियन्स लिग फुटबलमा बायर्न म्युनिखले जित निकालेको छ ।
अन्तिम १६ को पहिलो लेगमा अर्को जर्मन क्लब लेभरकुसेनमाथि बायर्नले ३–० गोलले हराएको हो ।
घरेलु मैदान एलियान्ज एरेनामा बायर्नलाई जित दिलाउन ह्यारी केनले पेनाल्टीसहित दुई तथा जमाल मुसियालाले एक गोल गरे ।
खेलको ६२ औं मिनेटमा नोर्डी मुकिलीले रातो कार्ड खाएपछि लेभरकुसेन १० खेलाडीमा समेटिएको थियो । अब दोस्रो लेग मार्च १२ मा लेभरकुसेनको घरेलु मैदानमा हुनेछ ।
यस्तै, गएराति नै भएको अर्को खेलमा इटालियन क्लब इन्टर मिलानले डच क्लब फेयनुर्डलाई उसकै घरेलु मैदानमा २–० गोलले हरायो ।
इन्टरको जितमा खेलको ३८ औं मिनेटमा मार्कुस थुरामले तथा ५० औं मिनेटमा लौटारो मार्टिनेजले गोल गरे ।
जितसँगै इन्टरले एग्रिगेटमा २–० को अग्रता लिएको छ । अब दोस्रो लेग इन्टरको घरेलु मैदानमा हुनेछ ।
