काठमाडौं । न्युजिल्यान्ड च्याम्पियन्स ट्रफिको फाइनलमा प्रवेश गरेको छ ।
सेमिफाइनल अन्तरगत भर्खरै सम्पन्न खेलमा दक्षिण अफ्रिकालाई ५० रनले हराउँदै न्युजिल्यान्ड फाइनलमा पुगेको हो ।
न्युजिल्यान्डले दिएको ३६३ रनको लक्ष्य पछ्याएको दक्षिण अफ्रिकाले ५० ओभरमा ९ विकेट गुमाएर ३१२ रनमात्रै बनाउन सक्यो ।
उसका लागि डेभिड मिलरले शतकीय पारी खेलेपनि टोलिको हार टार्न सकेनन् । उनले अविजित १०० रन जोडे ।
यस्तै, रस्सी भान डर डुसेनले ६९, टेम्भा बभुमाले ५६ तथा एडियन मार्करमले ३१ रन जोडे ।
बलिङतर्फ न्युजिल्यान्डका मिचेल सान्टनरले तीन, म्याट हेनरी र ग्लेन फिलिप्सले दुई-दुई तथा रचिन रविन्द्र र माइकल ब्रासवेलले एक-एक विकेट लिए ।
त्यसअघि टस जितेर पहिले ब्याटिङ गरेको न्युजिल्यान्डले ५० ओभरमा ६ विकेट गुमाएर ३६२ रनको विशाल योगफल तयार गर्यो ।
उसका लागि केन विलियम्सन र रचिन रविन्द्रले शतक प्रहार गरे । रविन्द्रले १०८ तथा विलियम्सनले १०२ रन जोडे । यस्तै, डेरिल मिचेल र ग्लेन फिलिप्सले ४९-४९ रनको योगदान दिए ।
वलिङतर्फ अफ्रिकाका लुङ्गी एन्जीडीले तीन तथा कागीसो रबाडाले दुई तथा विआन मुल्डरले एक विकेट लिए ।
अब न्युजिल्यान्डले उपाधिका लागि भारतसँग प्रतिस्पर्धा गर्नेछ । फाइनल खेल आइतबार हुनेछ ।
हिजो भएको पहिलो सेमिफाइनलमा भारतले अष्ट्रेलियालाई ४ विकेटले हराउँदै फाइनलको यात्रा तय गरेको हो ।
