काठमाडौँ । इब्राहिम जाद्रानको शतक र अजमातुल्लाह ओमरजाईको घातक बलिङको मद्दतले अफगानिस्तानले इङ्ल्यान्डलाई च्याम्पियन्स ट्रफीबाट बाहिरिने बाटो देखाएको छ ।
लाहोरको गद्दाफी स्टेडियममा बुधबार भएको खेलमा टस जितेर पहिले ब्याटिङमा आएको रासिद खानको कप्तानीमा रहेको टोलीले निर्धारित ५० ओभरमा सात विकेट गुमाएर ३२५ रन बनाएको थियो ।
जवाफमा इङ्ल्यान्डको टोली ४९.५ ओभरमा ३१७ रन मात्रै बनाउन सक्यो र अलआउट भयो । यससँगै अफगानिस्तानले जारी प्रतियोगितामा पहिलो जित दर्ता गरेको छ ।
यो प्रतियोगितामा जोस बटलरको टोलीको यात्रा समाप्त भयो । इङ्ल्यान्ड यसअघि अस्ट्रेलियासँग ५ विकेटले पराजित भएको थियो । अब टोलीले आफ्नो अर्को खेल दक्षिण अफ्रिकासँग खेल्नुपर्नेछ । यो खेल शनिबार (१ मार्च)मा कराँचीमा हुनेछ ।
अफगानिस्तानले यो जितसँगै प्रतियोगितामा आफ्नो आशा जीवित राखेको छ । समूह ‘बी’ मा उसको २ अंक र नेट रन रेट (०.९९) सहित तेस्रो स्थानमा पुगेको छ भने दक्षिण अफ्रिका र अष्ट्रेलिया क्रमशः पहिलो र दोस्रो स्थानमा छन् । अब अफगानिस्तानले आफ्नो तेस्रो खेल शुक्रबार अस्ट्रेलियासँग खेल्ने छ ।
खेलमा के भयो ?
लक्ष्य पछ्याउँदै इङ्ल्यान्डले अन्तिमसम्म प्रयास गरे पनि अफगान बलरको हातबाट पराजित भयो ।
अजमातुल्लाह उमरजाईले इङ्ल्यान्डका ब्याट्सम्यानलाई ध्वस्त पारे । उनले फिल साल्टलाई १२ रनमा प्याभिलियन पठाए । यसपछि मोहम्मद नाबीले जेमी स्मिथलाई आफ्नो शिकार बनाए ।
उनले विकेटकिपर ब्याट्सम्यानलाई उमरजाईबाट क्याच आउट गराए । उनी ९ रन मात्र बनाएर फर्किए । राशिद खानले टोलीलाई तेस्रो झट्का दिए । उनले बेन डकेट (३८) लाई एलबीडब्ल्यू आउट गराए ।
इङ्ल्यान्डका लागि जो रुटले शतक प्रहार गरे । उनले १११ बलमा १२० रन बनाए । यस अवधिमा उनको ब्याटबाट ११ चौका र एक छक्का आयो । उनका अलावा ह्यारी ब्रुकले २५, जोस बटलरले ३८, लियाम लिभिङस्टोनले १०, जेमी ओभरटनले ३२, जोफ्रा आर्चरले १४, आदिल रसिदले पाँच र मार्क वुडले दुई रन बनाए ।
अफगानिस्तानका लागि उमरजाई बाहेक मोहम्मद नाबीले २ विकेट लिए भने फजलहक फारुकी, राशिद खान र गुलबदिन नाइबले एक–एक विकेट लिए ।
यसअघि इब्राहिम जाद्रानको १७७ रनको इनिङ्सको मद्दतमा अफगानिस्तानले इंग्ल्याण्डलाई ३२६ रनको लक्ष्य दिएको थियो । यस खेलमा अफगानिस्तानले टस जितेर पहिले ब्याटिङ गर्ने निर्णय गरेपनि सुरुवात राम्रो हुन सकेन ।
इङ्ल्यान्डका तिब्र गतिका बलर जोफ्रा आर्चरले अफगानिस्तानलाई सुरुमै तीन झट्का दिए । तर, जाद्रान र शाहिदीले पारीको जिम्मा लिए र ऐतिहासिक इनिङ खेलेपछि अफगानिस्तानले निर्धारित ५० ओभरमा ७ विकेट गुमाएर ३२५ रन बनाउन सफल भयो ।
प्रारम्भिक असफलतापछि जाद्रानले कप्तान हशमतुल्लाह शाहिदीसँग चौथो विकेटका लागि १०३ रनको साझेदारी गरे । साहिदी आउट भएपछि पनि जाद्रानले आफ्नो इनिङलाई निरन्तरता दिँदै शतक बनाए । यसपछि पनि उनले रनको गति सुस्त हुन दिएनन् ।
जाद्रानले आफ्नो १४६ बलको इनिङ्समा १२ चौका र ६ छक्का प्रहार गरे र च्याम्पियन्स ट्रफीको इतिहासमा सर्वाधिक व्यक्तिगत स्कोर बनाउन सफल भए ।
अफगानिस्तानका लागि जाद्रानका अलावा अजमातुल्लाह ओमरजाईले ४१ रन, शाहिदीले ४० रन र मोहम्मद नाबीले २४ बलमा ४० रन बनाए । रहमानउल्लाह गुरबाज ६ रन बनाएर आउट भए भने सेदिकुल्लाह अटल ४ रन बनाएर र रहमत शाह ४ रन बनाएर आउट भए ।
इङ्ल्यान्डका आर्चरले तीन विकेट लिए भने लियाम लिभिङस्टोनले दुई तथा जेमी ओभरटन र आदिल रसिदले एक–एक विकेट लिए ।
