काठमाडौँ । जोस इंग्लिस र एलेक्स क्यारीको शतकीय साझेदारीको आधारमा अष्ट्रेलियाले च्याम्पियन्स ट्रफीमा कीर्तिमानी रनको लक्ष्य हासिल गरेको छ ।
शनिबार लाहोरको गद्दाफी स्टेडियममा इंग्ल्याण्डले ३५१ रन बनाएको थियो । अष्ट्रेलियाले ४७.३ ओभरमा ५ विकेट गुमाएर ३५६ रन बनाउँदै खेल जित्यो । प्लेयर अफ द म्याच जोस इंग्लिसले ८६ बलमा १२० रन बनाए ।
अस्ट्रेलियाले आईसीसी च्याम्पियन्स ट्रफी र एकदिवसीय विश्वकप इतिहासमा सबैभन्दा ठूलो रनको लक्ष्य हासिल गर्यो । यसअघि सन् २०२३ को एकदिवसीय विश्वकपमा पाकिस्तानले श्रीलंकाविरुद्ध हैदराबादमा ३ सय ४५ रन बनाएको थियो ।
इंग्ल्याण्डका बेन डकेटले १६५ रन बनाए । यो च्याम्पियन्स ट्रफीको सर्वाधिक व्यक्तिगत स्कोर पनि हो ।
३५२ रनको लक्ष्य पछ्याउने क्रममा अष्ट्रेलियाले १२२ रनमा ३ विकेट गुमाएको थियो । जोस इंग्लिस ब्याटिङ गर्न आए । उनले पहिलो बलमै चौका प्रहार गरे । त्यसपछि उनले ४१ बलमा अर्धशतक र ७७ बलमा शतक बनाए ।
उनले एलेक्स केरीसँग ५औं विकेटका लागि १४६ रनको साझेदारी गर्दै टोलीलाई जित दिलाए । इंग्लिसले १२० रनको इनिङ्स खेल्दै टोलीलाई जित दिलाए । अन्त्यमा ग्लेन म्याक्सवेलले १५ बलमा ३२ रन बनाएर टोलीलाई जित दिलाउन महत्वपूर्ण भूमिका खेले । इङ्ल्यान्डका मार्क वुड, जोफ्रा आर्चर, ब्रायडन कार्स, लियाम लिभिङ्स्टन र आदिल रसिदले समान १–१ विकेट लिए ।
इंग्ल्याण्डका लागि ब्याटिङ गर्दा ओपनर बेन डकेटले १६५ रनको इनिङ खेले । उनले १७ चौका र ३ छक्का प्रहार गरे । डकेटले जो रुटसँग १५८ रनको साझेदारी गरे । उनले ४८ औं ओभरसम्म ब्याटिङ गर्दै टोलीलाई ३२० भन्दा माथि पुर्याए । उनको यो स्कोर च्याम्पियन्स ट्रफीको इतिहासमा सर्वाधिक व्यक्तिगत स्कोर हो ।
अस्ट्रेलियाका बेन द्वारसले ३ विकेट लिए । एडम जाम्पा र मार्नस लाबुस्चेनले २–२ विकेट लिए ।
