एजेन्सी। इरानका संसदीय अध्यक्ष मोहम्मद बाघेर गालिबफ हिजबुल्लाहका लामो समयदेखिका प्रमुख हसन नसरल्लाहको अन्त्येष्टिमा आइतबार लेबनान जाने भएको इरानी सञ्चारमाध्यमले जनाएका छन्।
बेरुतमा इरान समर्थित समूहका नेताको बिदाइमा दशौँ हजार मानिस उपस्थित हुने अपेक्षा गरिएको छ । गत वर्ष सेप्टेम्बर २७ मा नसरल्लाहको समूह र इजरायलबीच करिब एक वर्षको न्यून–स्तरको द्वन्द्वपछि पूर्ण युद्धको सुरुआतमा इजरायली हवाई आक्रमणमा उनी मारिएका थिए ।
हिजबुल्लाहको दक्षिणी बेरुतको गढमा भएको ठूलो हवाई आक्रमणमा इरानको इस्लामिक रिभोलुसनरी गार्ड कर्प्सको विदेशी अपरेसन शाखा कुद्स फोर्सका वरिष्ठ कमान्डर अब्बास निलफोरोसनको पनि मृत्यु भएको थियो ।
हिजबुल्लाह इरानको ‘प्रतिरोध धुरी’ को अंश हो र इजरायलको विरोधमा एकजुट भएका शक्तिहरूको लचिलो गठबन्धन हो । सन् २०२३ अक्टोबरमा गाजा युद्धका क्रममा हिजबुल्लाहले आफ्नो साथी धुरी सदस्य हमाससँग ऐक्यबद्धता जनाउँदै इजरायलमाथि रकेट प्रहार गर्न थालेको थियो ।
ती आदान–प्रदानहरू गत वर्ष नोभेम्बरमा युद्धविराम लागू हुनुअघि दुई महिनाभन्दा बढी पूर्ण–स्तरको युद्धमा परिणत भएका थिए । संसद सदस्य अलीरेजा सलिमीले शनिबार सरकारी समाचार संस्था आइआरएनएलाई बताए अनुसार गालिबफ केही सांसदहरू र राज्यका अधिकारीहरूसहित आइतबार नसरल्लाहको अन्त्येष्टिमा सहभागी हुन लेबनान जानेछन् ।
शुक्रबार साँझ फार्स समाचार एजेन्सीले विदेशमन्त्री अब्बास अराघची पनि समारोहमा सहभागी हुने जानकारी दिएको थियो । नसरल्लाहले तीन दशकभन्दा बढी हिजबुल्लाहको नेतृत्व गरेका थिए र मध्यपूर्व राजनीतिका एक प्रमुख व्यक्ति थिए । उनको हत्याको बदलामा इरानले अक्टोबरमा इजरायलमाथि करिब दुई सय वटा मिसाइल प्रहार गरेको थियो ।
जवाफमा इजरायलले इरानका केही सैन्य ठाउँमा आक्रमण गरेको थियो ।
