काठमाडौं । परराष्ट्रमन्त्री शिशिर खनाल र नेपालका लागि साउदी अरबका राजदूत फहद मोहम्मद ए. मनिखरबीच नेपाल–साउदी अरब द्विपक्षीय सम्बन्धका विषयमा छलफल भएको छ।
परराष्ट्र मन्त्रालयमा बिहीबार भएको शिष्टाचार भेटमा नेपाल र साउदी अरबबीचको द्विपक्षीय सम्बन्ध, श्रम गतिशीलता, आर्थिक सहकार्य तथा साझेदारीका विषयमा विचार आदानप्रदान भएको हो।
भेटमा साउदी अरबमा रहेका तथा कार्यरत नेपाली नागरिकको हित, कल्याण र सुरक्षासँगै कन्सुलर सेवासम्बन्धी विषयमा पनि छलफल भएको मन्त्रालयले जनाएको छ।
त्यसैगरी, भेटवार्तामा पछिल्लो समय पश्चिम एसियामा विकसित भइरहेका घटनाक्रमबारे समेत विचार आदानप्रदान भएको थियो।
नेपाल र साउदी अरबबीच श्रम तथा आर्थिक सहकार्यलाई थप प्रभावकारी बनाउँदै नेपाली श्रमिकको हित र कल्याण सुनिश्चित गर्ने विषयमा समेत छलफल केन्द्रित रहेको जनाइएको छ।
