काठमाडौं । राष्ट्रिय स्वतन्त्र पार्टी (रास्वपा) ले स्वतन्त्र विद्यार्थी युनियन (स्ववियु) निर्वाचनमा उम्मेदवारी नदिने भएको छ ।
आगामी ५ चैतमा त्रिविका सम्बन्धन र आंगिक क्याम्पसहरूमा हुन लागेको स्ववियु चुनावमा रास्वपाले दलगत हुने गरी उम्मेदवार खडा नगर्ने भएको हो ।
स्ववियु चुनावमा रास्वपाका तर्फबाट उम्मेदवार नहुने कार्यवाहक महामन्त्री कवीन्द्र बुर्लाकोटीले जानकारी दिए । उनले भने, ‘स्वतन्त्र विद्यार्थी युनियन स्वतन्त्र नै हुनुपर्दछ । त्यसैले स्वतन्त्र भएर शैक्षिक हितको लागि काम गर्ने विद्यार्थी नेताहरू निर्वाचित हुनुपर्दछ । दलीय हिसाबले हुनु हुँदैन । स्वतन्त्र रूपमा उठेका उपयुक्त पात्रलाई समर्थन गर्न पार्टीले आह्वान गर्छ ।’
स्ववियुमा विद्यार्थी हक हित, शैक्षिक वातावरण सुधार लगायका काममा क्रियाशील विद्यार्थी नेताहरू विजयी हुनुपर्ने बुर्लाकोटीले बताए ।
स्ववियु निर्वाचन आंगिकतर्फ ६२ र सम्बन्धन प्राप्त एक हजार ४० क्याम्पसमा हुने भनिएको छ ।
