काठमाडौँ । जिल्ला प्रहरी परिसर काठमाडौंले अनलाईन बेटिङ खेल्ने/खेलाउने कार्यमा संलग्न चार जना भारतीय नागरिकहरुलाई पक्राउ गरेको छ ।
पक्राउ पर्नेमा भारत उत्तर प्रदेश गोरखपूरका २२ बर्षीय आरीफ हुसेन, सोहि स्थानका २५ बर्षीय अविशेक मदेसिया, फत्तेपूरका ४२ बर्षीय अब्दुल कलाम र सोहि स्थानका ४० बर्षीय ईरफान पठान रहेका छन् । प्रहरी वृत महाराजगंज र प्रहरी प्रभाग बुढानिलकण्ठबाट खटिएको टोलिले अनलाइन जुवा सट्टाबाजी खेलाईरहेको अवस्थामा उनीहलाई पक्राउ गरेको हो ।
उनीहरुसँग बरामद गरिएको ल्यापटप तथा मोबाइलको प्रारम्भिक अनुसन्धान गर्दा दुई अर्ब भन्दा बढि नेपाली रुपैयाँ कारोबार हुनेगरी अनलाइन जुवा कारोबार भएको प्रहरीले जनाएको छ ।
प्रहरीले उनीहरुको साथबाट १२ थान ल्यापटप, १२ थान मोबाईल, ७ थान क्यालकुलेटर र हिसाबकिताबको अभिलेख राखिएको १३३ लुज पाना तथा ३ थान डायरी बरामत गरेको छ ।
उनीहरुमाथि काठमाडौँ जिल्ला अदालतबाट ५ दिनको म्याद थप गरी अनुसन्धान भईरहेको प्रहरीले जनाएको छ ।
