एजेन्सी । भारतको मध्य प्रदेशको जबलपुर जिल्लामा एक हायसलाई ट्रकले ठक्कर दिएको छ । भीषण सडक दुर्घटनामा सात जनाको मृत्यु भएको छ भने ठक्करबाट चकनाचुर भएको गाडीमा केही यात्रु फसेका छन् ।
उनीहरु गम्भीर घाइते भएकाले उनीहरुलाई बचाउने प्रयास भइरहेको भारतीय सञ्चारमाध्यमले जनाएको छ । जानकारी अनुसार जबलपुरको राष्ट्रिय राजमार्ग ३० मा बिहान ८ बजे दुर्घटना भएको हो ।
सूचना पाएलगत्तै कलेक्टर र एसपीसहितको प्रहरी टोली घटनास्थलमा पुगेर यात्रुमा फसेका मानिसको उद्धारको प्रयास सुरु गरेको थियो ।
ट्राभलरमा सवार सबै आन्ध्र प्रदेशका रहेको बताइएको छ । जो महाकुम्भमा स्नान गर्न प्रयागराज आएका थिए । घर फर्कने क्रममा जबलपुरमा गाडी दुर्घटनामा परेको थियो ।
प्रहरीले मृतक र घाइतेका परिवारलाई फोन गरेर दुर्घटनाबारे जानकारी गराएको छ । गम्भीर घाइतेहरुको अस्पतालमा उपचार भइरहेको छ । मृतकको शव अस्पतालको शवगृहमा राखिएको छ । परिवारका सदस्य आएपछि उनीहरुको पोस्टमार्टम हुनेछ ।
