काठमाडौँ। नाइजेरियाले आगामी पाँच वर्षभित्र देशभर नियमित खोप अभियान र प्राथमिक स्वास्थ्य सेवालाई सुदृढ बनाउन ‘गाभी, द भ्याक्सिन एलायन्स’ बाट करिव ५० करोड अमेरिकी डलर बराबरको सहायता प्राप्त गरेको छ ।
गाभीको ६.० कार्यक्रम अन्तर्गत स्वीकृत भएको सो सहयोग राशि नाइजेरियाका स्वास्थ्य तथा समाज कल्याण मन्त्री मोहम्मद अली पाटे र गाभीकी प्रमुख कार्यकारी अधिकृत (सीईओ) सानिया निश्तारबीच राजधानी अबुजामा भएको उच्च स्तरीय छलफलपछि सुनिश्चित भएको हो ।
छलफलका क्रममा स्वास्थ्य मन्त्री पाटेले नाइजेरियाको खोप अभियानका लागि प्रस्ताव गरिएको यो सहयोगले आन्तरिक वित्तीय व्यवस्थापनमा थप प्रोत्साहन मिल्ने बताउनु भयो ।
उहाँले यस सहायताबाट खोपको आपूर्ति मात्र नभई यसको प्रभावकारी वितरण समेत सुनिश्चित हुने विश्वास व्यक्त गर्नुभयो । त्यसैगरी, गाभीकी सीईओ सानिया निश्तारले नाइजेरियासँगको साझेदारीलाई पुनः पुष्टि गर्दै स्वास्थ्य क्षेत्रका वित्तीय चुनौतीहरूलाई समाधान गर्न र नियमित खोप अभियानलाई थप प्रभावकारी बनाउन यो सहयोग केन्द्रित रहने उल्लेख गर्नुभयो ।
यस सहायता राशिलाई नाइजेरियामा नियमित खोप अभियानलाई तिब्रता दिन, पोलियो उन्मूलन कार्यक्रमलाई निरन्तरता दिन, ह्युमन प्यापिलोमा भाइरस (एचपिभी) खोपको विस्तार गर्न र प्राथमिक स्वास्थ्य सेवालाई मजबुत बनाउन परिचालन गरिनेछ ।
साथै, यसले दीर्घकालीन खोप वित्तीय व्यवस्थापनमा सुधार ल्याउने लक्ष्य समेत राखेको छ । सिन्ह्वा/न्युज एजेन्सी नेपाल
