काठमाडौं। भ्याली पब्लिक र संस्कृतिले प्रथम ज्ञान संस्कार अन्तरविद्यालय बास्केटबल प्रतियोगिताको जुनियर ब्वाइजमा मंगलबार जित हात पारेका छन् ।
सामाखुशीस्थित आयोजक ज्ञान संस्कारको कोर्टमा भ्याली पब्लिकले इडेन ब्रिज एकेडेमी (इबीए) लाई ३९–३४ ले पराजित गर्यो । भ्याली पब्लिकको जितमा अशोक विकले १७ अंक योगदान गरे । रशिद धाक्वाको ६ अंक सहयोगमा संस्कृतिले रिलायन्सलाई १६–१३ ले हरायो ।
जुनियर ब्वाइजमै एन्जल्स हार्टले सेबलाई ३४–३०, किङडमले एचएचसीएलाई २९–२५, रिलायन्स पब्लिकले ह्वाइट माउन्टेनलाई २५–२० र पारामाउन्ट एकेडेमीले ग्रिनल्यान्डलाई १८–१५ ले पाखा लगाए । एन्जल्स हार्टका रुपेश पौडेलले १२, किङडमका प्रवेश लामाले १३, रिलायन्स पब्लिकका मुनित सक्सेनाले १२ र पारामाउन्टका सुशान्त थापाले १६ स्कोर गरे ।
जुनियर गल्र्समा बौद्ध चिल्ड्रेन हेभेनले आयोजक ज्ञान संस्कारलाई ३५–३०, फेरिल्यान्डले बागमतीलाई ३२–२६, काष्ठमण्डपले सत्यसाईलाई २०–१३ र केभीकेएसएसले तेजस्वी एकेडेमीलाई १५–११ ले पन्छाए । बौद्धकी दिसन तामाङले ११, फेरिल्यान्डकी करुण बोगटीले १६ र केभीकेएसएसकी खुशीले ७ अंक बटुले ।
