काठमाडौं । नेकपा एमालेका महासचिव शंकर पोखरेलले अहिलेको सरकार अप्राकृतिक भनि भ्रम फिँजाउने काम भइरहेको बताउनुभएको छ ।
राष्ट्रिय युवा संघ नेपालले आयोजना गरेको राष्ट्रिय भेलालाई शनिबार सम्बोधन गर्दै पोखरेलले लोकतन्त्रमा जनताले पत्याएका दलले शासन गर्नु पर्ने र ती दलले शासन गर्ने कुरा प्राकृतिक भएको प्रष्ट पार्नुभयो । जनताले अस्वीकार गरेका दलहरू शीर्ष स्थानमा रहने कुरा अप्राकृतिक भएको उहाँले बताउनुभयो ।
कांग्रेस एमाले सधैँ भरिका लागि नमिलेका पनि उहाँले स्पष्ट पार्नुभयो । जनताको बिचमा जाने बेलामा नेकपा एमाले र नेपाली कांग्रेस कसैको बैसाखी नटेकी निर्वाचनमा जाने उहाँले बताउनुभयो ।
देश बनाउनको लागि धेरै राजनीतिक दल होइन ठुला र बलिया राजनीतिक दल आवश्यक रहेको उहाँले बताउनुभयो । ठुला र बलिया दलले मात्र मुलुकमा विकास र समृद्धिको काम गर्न सक्ने पोखरेलले स्पष्ट पार्नुभयो ।
एमाले पार्टीको नीति एमालेको मात्र नीति बनेर देश अघि नबढ्ने उहाँले बताउनुभयो । एमालेको नीति मुलुकको नीति बन्नु पर्ने पोखरेलले स्पष्ट पार्नुभयो । त्यसका लागि एमालेको नीति मिसन २०८४ र एमालेको एकल बहुमतको सरका भएको पोखरेलले बताउनुभयो ।
नयाँ पुस्तालाई राजनीतिसँग जोड्न नसक्ने राजनीतिक दलले देशको लागि काम गर्न नसक्ने उहाँले बताउनुभयो । नेकपा एमाले युवामा भरोसा गर्ने र युवालाई अवसर दिने पार्टी भएको पोखरेलले स्पष्ट पार्नुभयो । ‘अबको युग युवाको युग हो, युवाको साथमा नेकपा एमाले छ’, उहाँले भन्नुभयो ।
देशलाई बलिया राजनीतिक दल, स्पष्ट राजनीतिक दृष्टिकोण र दूरदर्शी नेतृत्व आवश्यक रहेको पोखरेलले बताउनुभयो । त्यो क्षमता नेकपा एमाले र एमाले अध्यक्ष केपी शर्मा ओलीसँग मात्र रहेको उहाँले स्पष्ट पार्नुभयो । ‘हामी केपी ओलीको नेतृत्वमा नेपाललाई समृद्ध नेपाल, सुखी नेपालीको आकाङ्क्षा पुरा गर्ने अभियान चलाउन चाहन्छौँ’, उहाँले भन्नुभयो ।
आज राष्ट्र निर्माण गर्ने व्यक्ति केपी ओली माथि चौतर्फी हमला भइरहेको उहाँले बताउनुभयो । त्यो सङ्कट समाधानका लागि राष्ट्रिय युवा संघ नेपाललाई अग्र मोर्चामा उभिन उहाँले आग्रह गर्नुभयो । देशको सार्वभौम स्वाधीनता रक्षाका लागि नेपाली युवा जाग्नु पर्नेमा पोखरेलले जोड दिनुभयो ।
एमाले र केपी ओली माथि नराम्रो काम गरेको कारण हमला नभएको उहाँले बताउनुभयो । नेपाललाई असफल गराउन चाहनेहरूले एमाले र केपी ओली माथि हमला गरिरहेको पोखरेलले बताउनुभयो ।
उहाँले जहाँ सङ्कट हुन्छ, त्यहाँ समाधान हुने बताउनुभयो । त्यसैले केही गर्छु भन्ने युवालाई देशमा नै सम्भावना भएको उहाँले बताउनुभयो । नेपाल हामी आफैँ बनाउने भावनाका साथ युवा जाग्नु पर्ने र लाग्नु पर्नेमा उहाँले जोड दिनुभयो ।
समाजलाई अघि बढाउन समाजमा आशा जगाउनु पर्ने बताउँदै उहाँले एमाले अध्यक्ष केपी शर्मा ओली आशाको संवाहक भएको बताउनुभयो । एमाले अध्यक्ष केपी ओलीले देखेका सपना आज व्यवहारमा बदलिँदै गएका पोखरेलले स्पष्ट पार्नुभयो ।
