एजेन्सी। भारतीय कलाकार तथा सेलिब्रेटीहरूलाई ज्यान मार्ने धम्कीपूर्ण इमेलहरू आईरहेको छ । हास्य कलाकार तथा अभिनेता कपिल शर्मा र राजपाल यादवलाई ज्यान मार्ने धम्कीसहितको इमेल आएको भारतीय सञ्चारमाध्यमहरुले लेखेको छ । यी दुईबाहेक रेमो डिसुजा र सुगंधा मिश्रालाई पनि धम्की आएको छ ।
सेलिब्रेटीहरूलाई प्राप्त धम्कीपूर्ण इमेलहरूको मुद्दामा प्रहरीले एफआईआर दर्ता गरेर अनुसन्धान गरिरहेको छ । प्रारम्भिक अनुसन्धानअनुसार इमेल पाकिस्तानबाट पठाइएको पाईएको भारतीय सञ्चारमाध्यमले जनाएको छ ।
इमेलमा सेलिब्रेटीहरलाई मात्र नभएर उनीहरूका नजिकका व्यक्ति र आफन्तहरूलाई पनि लक्षित गरिएको छ । यस विषयमा मुम्बईको अम्बोली प्रहरीले धारा ३५१ (३) अन्तर्गत मुद्दा दायर गरेको छ ।
मिडिया रिपोर्टका अनुसार धम्कीपूर्ण इमेल विष्णु नामक व्यक्तिले पठाएका हुन् । ‘यो सबै हामी प्रचार स्टन्टको रूपमा गरिरहेका छैनौं । हामीसँग तपाईंका सबै गतिविधिका जानकारी छन् । हामी आगामी ८ घण्टा भित्र तपाईंबाट तत्काल प्रतिक्रियाको अपेक्षा गर्दछौं । यदि हामीले कुनै जवाफ पाएनौं भने, हामी मान्नेछौं कि तपाईंले यो कुरालाई गम्भीरतापूर्वक लिइरहनुभएको छैन– विष्णु ।’ , इमेलमा लेखिएको छ ।
प्रहरीले इमेलको अनुसन्धान गरिरहेको छ ।
