एजेन्सी । बलिउड अभिनेता सैफ अली खानमाथि भएको प्राणघातक हमलाको प्रकरणमा लगातार नयाँ नयाँ जानकारीहरु आइरहेका छन् ।
अब यो प्रकरणमा नयाँ मोड आएको छ । फरेन्सिक ल्याबको अनुसन्धानका अनुसार सैफको घरमा रहेको सीसीटीभी क्यामेरामा कैद भएका व्यक्ति र प्रहरीको हिरासतमा रहेका अभियुक्त फरक–फरक व्यक्ति हुन् ।
जनवरी १६ मा सैफ अली खानको बान्द्राको घरमा भएको हमलापछि प्रहरीले यस प्रकरणको अनुसन्धान गरिरहेको छ ।
सैफको घरबाट बरामद गरिएको सीसीटीभी फुटेजको अनुसन्धानले सैफको घरमा प्रवेश गर्ने र बाहिर निस्कने व्यक्ति र प्रहरी हिरासतमा रहेका अभियुक्त फरक–फरक व्यक्ति भएको खुलेको छ ।
यसबाट प्रहरी हिरासतमा रहेको व्यक्ति सैफको घरमा देखिएका व्यक्तिसँग मेल खाँदैन भन्ने स्पष्ट हुन्छ ।
फरेन्सिक ल्याबको प्रतिवेदन अनुसार सीसीटीभी फुटेजमा देखिएका व्यक्तिको शारीरिक संरचना, उचाइ र अनुहार पक्राउ परेका अभियुक्तभन्दा बिल्कुलै फरक रहेको छ । यसबाट एउटा कुरा स्पष्ट हुन्छ कि प्रहरी हिरासतमा उपस्थित व्यक्ति सैफको घरमा देखिएका व्यक्तिभन्दा बिल्कुलै भिन्न छन् ।
यो नयाँ खुलासापछि प्रहरीले अनुसन्धानलाई तीब्र बनाएको छ । अब प्रहरीले पक्राउ परेका अभियुक्त सैफ अली खानमाथि भएको हमलामा साँच्चै संलग्न थिए वा थिएनन् भन्ने सुनिश्चित गर्नुपर्नेछ । यसका लागि प्रहरीले आरोपीलाई सोधपुछ गर्न थालेको छ भने बाँकी प्रमाणको खोजी सुरु गरेको भारतीय सञ्चारमाध्यमले जनाएको छ ।
