काठमाडौँ । आईसीसी यू–१९ टी–२० महिला विश्वकप क्रिकेटमा नेपालले हारबाट प्रतियोगिताको सुरुवात गरेको छ ।
भर्खरै सम्पन्न खेलमा नेपाल बङ्गलादेशसँग ५ विकेटले पराजित भएको हो ।
नेपालले दिएको ५३ रनको सामान्य लक्ष्य बङ्गलादेशले १३.२ ओभरमा ५ विकेट गुमाएर भेट्टायो । उसका लागि सदिया इस्लामले १६, सुमैया अक्तरले १२, अफिया अशिमा इराले ९, जन्नतुल मोउवाले ५ रन जोडिन् ।
बलिङतर्फ नेपालकी रचना चौधरी, रिया शर्मा, सिमाना केसी र पूजा महतोले एक–एक विकेट लिए ।
त्यसअघि मलेसियाको बाङ्गीमा रहेको युकेएम ओभल क्रिकेट मैदानमा टस हारेर पहिला ब्याटिङ गरेको नेपालले १८ दशमलव दुई ओभरमा सबै विकेट गुमाएर ५२ रन मात्रै बनाउन सक्यो ।
नेपालका लागि ओपनर साना प्रविनले ३२ बलमा १९ रन जोडिन । त्यस्तै सिमाना केसीले १० रन बनाइन् । अन्य ब्याटरले दोहोरो अङ्कमा रन जोड्न सकेनन् ।
नेपाललाई सस्तैमा समेट्ने क्रममा बङ्गलादेशका लागि बलिङतर्फ बंगलादेशकी जन्नतुल मोउआले दुई तथा निशिता अक्तर निशि, फहोमिदा चोया र अनिसा अक्तर सोवाले एक–एक विकेट लिइन् । नेपालका ५ खेलाडी रनआउट भएका थिए ।
नेपालको समूहमा स्कटल्यान्ड, बङ्गलादेश र अस्ट्रेलिया छन् । नेपालले दोस्रो खेल माघ ७ गते स्कटल्यान्डसँग खेल्नछ भने तेस्रो खेल माघ ९ गते अस्ट्रेलियासँग खेल्नेछ ।
