लन्डन । काई हाभर्टडको ह्याट्रिकमा चेल्सीले बुधबार ब्रान्सलीलाई ६–० ले हराउँदै लिग कपमा चौथो चरणको यात्रा तय गरेको छ । यस्तै आर्सनलले लेस्टर सिटीलाई २–० ले हराएर अर्को चरण पुग्न सफल रह्यो ।
बायर लेवरकुसनबाट १२ करोड ३० लाख डलरमा चेल्सी आएयता हाभर्टड प्रिमियर लिगका सुरुआती दुई खेलमा अपेक्षाअनुसार खेल्न असफल रहेका थिए । तर ब्रान्सलीविरुद्धको ह्याट्रिकपछि २१ वर्षीय जर्मन खेलाडीको आत्मविश्वास बढ्नेछ ।
यस्तै नयाँ सिजनमा एभरटनले उत्कृष्ट लय कायम राख्दै लिग वान टिम फ्लिटउडलाई ५–२ ले हरायो । लिगका सुरुआती दुई खेलसँगै कार्लो एन्सेलोटीको टिमको यो लगातार तेस्रो जित हो ।
