![](https://newspolar.com/wp-content/uploads/2022/03/dean_jones_died_2020_mumbai_TueZXsWgGF.jpg)
मुम्बईः अस्ट्रेलियाका पूर्व क्रिकेटर डिन जोन्सको हृदयाघातका कारण बिहीबार मुम्बईमा निधन भएको छ । उहाँ ५९ वर्षका हुनुहुन्थ्यो ।
इन्डियन प्रिमियर लिग (आइपिएल) को कमेन्टेटरको रुपमा सहभागी हुन मुम्बईमा रहनु भएका जोन्सलाई मध्यान्हपख हृदयाघात भएको थियो ।
बुधबार मात्र क्रिकेट कमेन्ट्रीमा सहभागी भएका डिन जोन्स आज बिहीबार बिहान साथीहरुसँग बिहानको खाजानास्ता र समीक्षापछि होटल फर्किनु भएको थियो । होटलमा उहाँलाई हृदयाघात भएको थियो ।
जोन्सले अस्ट्रेलियाका लागि ५९ टेस्ट र १६४ एकदिवसीय क्रिकेट खेल्नु भएको थियो । उहाँले भारतको चेन्नाईमा भारत विरुद्ध दोहोरो शतक (२१० रन) प्रहार गर्नु भएको थियो । त्यो म्याचमा दुबै टिमबाट बराबर रन बनेका कारण “टाई” भएको थियो ।
उहाँ सन् १९८७ को अस्ट्रेलियाली विश्वकप टिमका सदस्य पनि रहनु भएको थियो जसमा अस्ट्रेलिया विजयी भएको थियो । उहाँले सन् १९९७–१९९८ मा क्रिकेटबाट सन्यास लिएपछि प्रशिक्षण र कमेन्ट्रीमा आफूलाई व्यस्त राख्नु भएको थियो ।