काठमाडौं । बुटवल प्रहरीले सुप्रिम बचत सहकारीको रकम अपचलनबारे अनुसन्धान पुरा गरेर प्रतिवेदन बुझाएको छ ।
सहकारीको अनुसन्धान पुरा गरेर प्रतिवेदन सरकारी वकिल कार्यालयमा बुझाइएको रुपन्देहीका एसपी रञ्जितसिंह राठौरले बताए । प्रहरीले रास्वपाका सभापति रवि लामिछाने र पूर्व डीआईजी छविलाल जोशी समेतलाई मुद्दा चलाउनुपर्ने रायसहितको प्रतिवेदन बुझाएको छ ।
कास्की प्रहरीमा अनुसन्धान भइरहेका बेला रविमाथि सुप्रिम सहकारी ठगी प्रकरणमा पक्राउ पुर्जी जारी भएको थियो । पछि २७ कात्तिकमा बुटवलस्थित सरकारी वकिलको कार्यालयमा पुगेर रविले बयान दिएका थिए ।
अनुसन्धान प्रतिवेदन अध्ययन गरेर सरकारी वकिल कार्यालयले रुपन्देही जिल्ला अदालतमा मुद्दा दायर गर्ने तयारी गरेको छ ।
गत २ कात्तिकमा काठमाडौंबाट पक्राउ परेका लामिछाने ८४ दिनपछि बिहीबार कास्की प्रहरीको हिरासतबाट रिहा भएका थिए । उनी ६५ लाख धरौटी बुझाएर हिरासत मुक्त भएका हुन् ।
