दुबईः रेकर्ड चार पटकको च्याम्पियन मुम्बई इन्डियन्सलाई सोमबार विराट कोहलीको कप्तानीमा रहेको रोयल च्यालेन्जर्स बैंगलोरले सुपर ओभरमा पराजित गरेको छ । दुबईमा खेलिएको यस खेलमा बैंगलोरले निर्धारित २० ओभरमा ३ विकेट गुमाउँदै २०१ रन बनाएको थियो । प्रत्युत्तरमा मुम्बईले पनि २० ओभरमा ५ विकेटको क्षतिमा २०१ रन बनाएर खेल बराबरी (टाई) बनाएको थियो ।
यसपछि नवदीप सैनीले गरेको कसिकसाउ बलिङमा सुपर ओभरमा मुम्बईले ७ रन मात्र बनाउन सक्यो । बैंगलोरका कप्तान विराट कोहलीले अन्तिम बलमा चौका प्रहार गरी टिमलाई जित दिलाए । मुम्बईका लागि सुपर ओभरको बलिङ जसप्रित बुमराहले गरेका थिए ।
किसन–पोलार्डको धुवाँधार ब्याटिङ काम लागेन
मुम्बईका लागि युवा ब्याट्सम्यान इसान किसनले ९९ रनको महत्वपूर्ण पाली खेलेका थिए तर अन्तिम ओभरको पाँचौं बलमा उनी आउट भए । उनले ५८ बलको पालीमा २ चौका र ९ छक्का प्रहार गरेका थिए । उनले किरोन पोलार्डसँग पाचौं विकेटका लागि ११९ रन बनाएर शतकीय साझेदारी गरेका थिए । पोलार्डले भने २४ बलमा नटआउट ६० रन बनाए । उनले ३ चौका र ५ छक्का प्रहार गरेका थिए ।
अन्तिम ४ ओभरमा मुम्बईलाई चाहिएको थियो ८० रन
मुम्बई इन्डियन्सलाई अन्तिम चार ओभरमा जितका लागि ८० रन चाहिएको थियो । मुम्बईका बिग हिटर पोलार्डले एडम जम्पाको १७औं ओभरको बलिङमा ३ छक्का र १ चौका प्रहार गरेर १७ औं ओभरमा स्कोर ४ विकेटमा १४९ बनाए । अन्तिम १२ बलमा मुम्बईलाई ३१ रन आवश्यक थियो । नवदीप सैनीले १९औं ओभरमा १२ रन मात्र थिए । मुम्बईलाई अन्तिम ओभरमा १९ रन आवश्यक थियो । इसुरु उदानाको अन्तिम ओभरको तेस्रो र चौथो ओभरमा किसनले छक्का प्रहार गरे तर अन्तिम बलमा ९९ को व्यक्तिगत रनमा किसन आउट भए ।
एबीको प्रभावशाली खेल
टस हारेर पहिले ब्याटिङको निम्तो पाएको बैंगलोरका लागि ओपनर आरोन फिन्च, देवदत्त पडिकल र एबी डि भिलियर्सले अर्धशतकीय पाली खेलेका थिए । एबीले २४ बलमा ४ चौका र ४ छक्काको मद्दतले अविजित ५५ रन बनाए । शिभम दुबेले पनि १० बलमा २७ रन बनाएर टिमको स्कोर २०२ बनाउन महत्वपूर्ण योगदान दिए ।
आइपिएलको यस सिजनको खेलमा यो दोस्रो पटक म्याच टाई भएको हो ।
RCB vs Mumbai Indians
एजेन्सी
