एजेन्सी । चलचित्र ‘पुष्पा–२’ को स्क्रिनिङका क्रममा भागदौडमा महिलाको मृत्यु भएको अभियोगमा साउथ अभिनेता अल्लु अर्जुन धरौटीमा रिहा भएका छन् ।
शुक्रबार हैदराबादको नामपल्ली अदालतले अल्लुलाई नियमित जमानत दिएको थियो ।
अल्लु अर्जुनका वकिल अशोक रेड्डीले भने कि अतिरिक्त महानगरीय सत्र न्यायाधीशले अल्लुलाई दुई जमानत पेश गर्न भनेका छन्, जसले प्रत्येक ५०,००० रुपैयाँको दुईवटा जमानत भर्नेछन् । अल्लुलाई आइतबार अनुसन्धान अधिकृत समक्ष उपस्थित हुन निर्देशन दिइएको छ ।
अल्लु अर्जुनलाई घटनाको सम्बन्धमा १३ डिसेम्बरमा पक्राउ गरिएको थियो र १४ डिसेम्बरमा तेलंगाना उच्च अदालतले उनलाई चार हप्ताको लागि अन्तरिम जमानत दिएको थियो । यसको अवधि जनवरी १० मा समाप्त हुन्छ ।
४ डिसेम्बरमा फिल्म पुष्पा–२ को स्क्रिनिङका क्रममा हैदराबादको सन्ध्या थिएटरमा भागदौड भएको थियो । सो क्रममा रेवती नामकी एक महिलाको मृत्यु भएको थियो भने उनको बच्चा घाइते भएका थिए ।
