![](https://newspolar.com/wp-content/uploads/2022/03/C4FF4C11-8696-46BA-8B1C-F3069F47EEAE_g7YWxZK4fJ.jpeg)
दुबईः इन्डियन प्रिमियर लिग क्रिकेट अन्तर्गत शनिबार भएको पहिलो खेलमा विराट कोहलीको शानदार प्रदर्शनका कारण रोयल च्यालेन्जर्स बैंगलोर विजयी भएको छ । २० ओभरको खेलमा राजस्थान रोयल्स ८ विकेटले पराजित भयो ।
राजस्थान रोयल्सले टस जिती पहिले ब्याटिङ रोजेको थियो । राजस्थानका कप्तान स्टिभन स्मिथ व्यक्तिगत ५ रन बनाएर इसुरु उडानाको बलमा आउट भएका थिए भने जस बटलर पनि २२ रन बनाएर नवदीप सैनीको बलमा आउट भए ।
युवा क्रिकेटर महिपाल लमरोरले ४७ तथा राहुल तेबतीयाले बनाएको २४ रनको मद्दतले राजस्थानले ६ विकेट क्षतिमा १५४ रन बनाएको थियो ।
राजस्थानलाई सस्तोमै समेट्ने क्रममा बैंगलोरका यजुबेन्द्र चहलले ३ विकेट लिएका थिए । अर्का बलर इसुरु उडानाले २ विकेट लिएका थिए ।
जितका लागि १५५ रनको लक्ष्य पाएको बैंगलोरले १९.१ ओभरमा १५८ रन बनाएर जित प्राप्त गरेको थियो । बैंगलोरका लागि ओपनिङ ब्याट्सम्यान देवदत्त पाडिकलले ६३ र आरोन फिन्चले ८ रन बनाएका थिए ।
तर जितका हिरो भए विराट कोहली । यसअघिका खेलमा राम्रो प्रदर्शन गर्न नसकेका कप्तान कोहलीले ५३ बलमा ७२ रनको नटआउट पाली खेले । उनले ७ चौका र २ छक्का प्रहार गरे ।
यस जितसँगै बैंगलोरले ४ खेलबाट ६ अंक सहित पहिलो स्थानमा उक्लिएको छ ।
अन्तिम स्थानमा रहेको चेन्नाई सुपर किंग्सको ४ खेलबाट २ अंक मात्र छ, र ऊ अंक तालिकामा पुछारमा छ ।
आजै शनिबार दिल्ली क्यापिटल्स र कोलकोता नाइट राइडर्सबीच खेल हुँदैछ । टस हारेर ब्याटिङको निम्तो पाएको दिल्लीले २ ओभरको खेलमा बिनाक्षति १६ रन बनाइसकेको छ । यस खेलमा पनि नेपाली युवा बलर सन्दीप लामिछानेले माैका पाएका छैनन् ।