![](https://newspolar.com/wp-content/uploads/2022/03/cavani_in_manu-2020_olss7UgbC8.jpg)
लन्डनः इङलिस प्रिमियर लिगको यस सत्रमा कमजोर शुरुवात गरेको म्यानचेस्टर युनाइटेडले उरुग्वेका स्ट्राइकर एडिन्सन काभानीलाई भित्र्याएको छ । ३३ वर्षीय काभानी फ्रान्सेली लिग लिडर पेरिस सेन्ट जर्मेन फुटबल क्लबबाट युनाइटेडमा स्थानान्तरित भएका हुन् ।
सन् २००७ मा युरोपेली क्लबमा आबद्ध भएका काभानीले युरोपेली क्लबहरुका लागि ३४१ गोल गरिसकेका छन् । काभानीले युनाइटेडको वेबसाइटमा प्रतिक्रिया दिँदै भनेका छन्ः “आफूले विगतमा पनि निकै मेहनत गरेको र युनाइटेडजस्तो प्रतिष्ठित क्लबबाट खेल्न पाउँदा आफूलाई गौरव लागेको छ ।”
पिएसजीमा रहँदा उनको क्लबले छ वटा उपाधि जितेको थियो । उनले क्लबका लागि २०० गोल गरिसकेका छन् । उनले सिरि ए र लिग १ दुबैबाट गोल्डेन बूट प्राप्त गरेका छन् ।
उरुग्वेका लागि उनले ११६ अन्तर्राष्ट्रिय खेल खेल्दै ५० गोल गरेका छन् ।
युनाइटेडले पोर्टोबाट अलेक्स टेलिसलाई पनि एक करोड ३६ लाख पाउन्डमा क्लबमा भित्र्याएको छ ।
म्यानचेस्टर युनाइटेडले आगामी शनिबार न्यूक्यासल युनाइटेड विरुद्ध खेल्दैछ ।
प्रिमियर लिगको बर्तमान अंक तालिकामा युनाइटेडले ३ खेलबाट ३ अंक मात्र जोडी १६ औं स्थानमा रहेको छ ।
गत आइतबारको खेलमा टोटेनह्याम हट्सपरले युनाइटेडलाई ६–१ गोल अन्तरले नराम्रोसँग पराजित गरेको थियो भने सेप्टेम्बर १९ मा क्रिस्टल प्यालेससँग ३–१ गोल अन्तरले पराजित भएको थियो ।
यी दुबै खेलमा युनाइटेड पराजित भएपछि क्लबका समर्थकले प्रतिभावान खेलाडी भित्र्याउन दबाब दिइरहेका थिए ।
(एजेन्सी)