काठमाडौँ । नेपाल प्रिमियर लिग (एनपिएल) क्रिकेटमा आज (बुधबार) प्लेअफका दुई वटा खेल हुँदैछन् ।
पहिलो खेलमा तेस्रो स्थानको चितवन राइनोज र चौथो स्थानको कर्णाली याक्सबीच प्रतिस्पर्धा हुनेछ । दुई टोलिबीचको खेल त्रिवि क्रिकेट मैदान कीर्तिपुरमा बिहान ९ बजे सुरु हुनेछ ।
यस खेलको विजेता दोस्रो क्वालिफायरमा पुग्नेछ भने हार्ने टोली बाहिरिनेछ ।
यस्तै आजको दोस्रो खेल दिउँसो १ बजे शीर्ष स्थानको सुदूरपश्चिम रोयल्स र दोस्रो स्थानको जनकपुर बोल्ट्सबीच हुनेछ । यो खेलको विजेता सीधै फाइनलमा पुग्नेछ भने हार्ने टोलीले प्लेअफको विजेतासँग दोस्रो क्वालिफायरमा खेल्नेछ ।
दोस्रो क्वालिफायर खेल भोलि दिउँसो १२ बजे हुनेछ । यो खेलको विजेता फाइनलमा पुग्नेछ भने हार्ने टोली बाहिरिनेछ । फाइनल खेल आउँदो शनिबार हुनेछ ।
प्रतियोगिताका शीर्ष चार टिमहरु सबैले नगद पुरस्कार पाउने भएका छन् । नेपाल क्रिकेट संघ (क्यान)का अनुसार विजेता सहित प्लेअफमा पुगेका चारवटै टिमले नगद पुरस्कार पाउने भएका हुन् ।
एक विज्ञप्ति जारी गर्दै क्यानले विजेता टिमलाई १ करोड १० लाख रुपैयाँ दिइने जनाएको छ । यस्तै, उपविजेताले ५१ लाख रुपैयाँ पाउने छ भने तेस्रो हुने टिमले २५ लाख प्राप्त गर्नेछ । चौंथो हुने टोलि पनि खाली हात जानेछैन । उसले १५ लाख रुपैयाँ पाउनेछ ।
