अबुधाबीः इन्डियन प्रिमियर लिग क्रिकेट अन्तर्गत आइतबारको दोस्रो खेलमा मुम्बई इन्डियन्सले यस सिजनमा उत्कृष्ट प्रदर्शन गर्दै आएको दिल्ली क्यापिटल्सलाई पाँच विकेटले पराजित गरेको छ ।
यो जितसँगै मुम्बई अंक तालिकामा १० अंक सहित शीर्ष स्थानमा उक्लेको छ । समान १० अंक रहेको दिल्ली रनरेटका आधारमा दोस्रो स्थानमा झरेको छ ।
टस जितेर पहिले ब्याटिङ रोजेको दिल्लीले ठूलो स्कोर खडा गर्न सकेन । दिल्लीले निर्धारित २० ओभरमा ४ विकेट गुमाएर १६२ रन मात्र बनाएको थियो । दिल्लीका लागि शिखर धवनले ६९, कप्तान श्रेयस ऐयरले ४२ रन बनाए पनि टिमले मध्यम स्कोरको मात्र चुनौती प्रस्तुत गरेको थियो ।
मुम्बईका बलरहरु जसप्रित बुम्राह, क्रुनाल पाण्ड्या समेतले कसिलो बलिङ गर्नुका साथै राम्रो क्षेत्ररक्षण गरेका थिए ।
केही सुस्त देखिएको पिचमा दिल्लीले प्रस्तुत गरेको चुनौती प्राप्त गर्न मुम्बईलाई कठिन हुने अनुमान गरिएको थियो । तर मुम्बईका ब्याट्सम्यानले सुझबुझ देखाउँदै निर्धारित १६३ को लक्ष्य १९.४ ओभरमा ५ विकेट गुमाउँदै पूरा गरेको थियो ।
मुम्बईका लागि क्वीन्टन डी ककले ५३, सूर्य कुमार यादवले ५३, इसन किसनले २८ रन बनाएका थिए ।
दिल्लीका लागि कागिसो राबाडाले २८ रन दिएर २ विकेट लिए पनि टिमलाई जिताउन पर्याप्त भएन ।
पछिल्लो अंक तालिका
मुम्बई इन्डियन्स – १०
दिल्ली क्यापिटल्स – १०
कोलकाता नाइट राइडर्स – ८
रोयल च्यालेन्जर्स बैंगलोर – ८
सनराइजर्स हैदराबाद – ६
राजस्थान रोयल्स – ६
चेन्नाई सुपर किंग्स – ४
किंग्स इलेभेन पञ्जाब – २
एजेन्सी
