एजेन्सी । अल्लु अर्जुन अभिनित फिल्म ‘पुष्पा–२’ ले कमाईका हिसाबले सबै रेकर्ड तोडेको छ । हिन्दी संस्करणमा फिल्मले आइतबार मात्रै ८६ करोड भारु कलेक्सन गरेको थियो ।
योसँगै फिल्मले अहिलेसम्म भारतीय बक्स अफिसमा ५२९.४५ करोड कमाइसकेको छ । फिल्मले रिलिज भएको चार दिनमा विश्वभर ८०० करोड भारु कलेक्सन गरेको इन्डस्ट्री ट्र्याकर सकनिल्कले जनाएको छ ।
व्यापार विज्ञ तरण आदर्शका अनुसार पुष्पा २ ले आइतबार मात्रै हिन्दी संस्करणमा ८६ करोड रुपैयाँ कमाएको छ ।
फिल्म ‘पुष्पा २’ को ओपनिङ डे कलेक्सनको कुरा गर्दा विश्वभर २९४ करोड कमाएको थियो । जसमा भारतीय बक्स अफिसमा फिल्मको कलेक्सन १७५.१ करोड थियो । पुष्पा–२ ले हिन्दी संस्करणमा ७२ करोड कमाएको थियो ।
‘पुष्पा–२’ तमिल, तेलुगु, मलयालम, कन्नड र हिन्दी गरी ५ भाषामा रिलिज भएको छ । फिल्ममा अल्लु अर्जुन फेरि पुष्पाराजको भूमिकामा देखिएका छन् । रश्मिका मन्दना पनि श्रीवल्लीको अवतारमा देखिएकी छिन् । यस्तै फहाद फासिल प्रहरी भनवर सिंह शेखावतको भूमिकामा छन् ।
फिल्मको लेखन र निर्देशन सुकुमारले नै गरेका छन् ।
