काठमाडौंः लिगेसी फर्निचर प्रालिले नेपालमा युरोपेली र अमेरिकी स्ट्यान्डर्डका फर्निचर बिक्री वितरण गर्न थालेको छ । यी फर्निचर उच्च गुणस्तरका समेत रहेको प्रालिको भनाई छ ।

सिभिल इन्जिनियरिङ पढेका युवा उद्यमी एवं प्रालिका निर्देशक अनुप वैद्यले यस उद्यमलाई गुणस्तरीय र आकर्षक बनाउन सन् २०१८ देखि नै महत्वपूर्ण जिम्मेवारी सम्हाली रहेका छन् ।

कोरोनाभाइरसका कारण पछिल्लो समय यस उद्योगमा पनि असर परेको छ । तर अहिले विस्तारै रिकभरी भइरहेको वैद्यको भनाई छ । उनी भन्छन्, “फर्निचर सबै घरपरिवारमा अति जरुरीको सामान हो । त्यसैले होटल वा रेस्टुराँ व्यवसाय जस्तो यसमा असर परेको छैन । हामीले केही अर्डर पनि पाउन थालेका छौं ।”

यी युवा उद्यमीले फर्निचर उद्योग सम्हालेको धेरै वर्ष भएको छैन । तर उनका बुबाले लिगेसी ब्रान्ड स्थापना र संचालन गरेको १५–२० वर्ष भइसक्यो, तर फर्निचर उद्योगमै परिवारभित्र झण्डै ३० वर्षको इतिहास छ । बुबाबाट आफूले धेरै कुरा सिक्न पाएको वैद्यको भनाई छ ।

फर्निचर उद्यमका बारेमा वैद्य भन्छन्, “हामीले नेपालमा फर्निचरमा नयाँ आयाम ल्याउन सफल भएका छौं । अझै पनि धेरै मानिसलाई मोड्युलर फर्निचरका बारेमा त्यति जानकारी छैन । फर्निचरका पार्टिकल बोर्डको प्रयोग गर्ने बारे आम उपभोक्ता अनभिज्ञ छन् । यो फर्निचर उद्योगमा विल्कुलै नयाँ विधा हो । बुबाले पार्टिकल बोर्ड अर्थात मोड्युलर फर्निचरका बारेमा जर्मन डिजाइनरबाट तालिम पनि लिनु भएको छ । बुबासँगै म पनि यही व्यवसायमा लागें, र अहिले त यो पारिवारिक व्यवसाय नै भएको छ । अहिले बुबा, म, मेरी पत्नी, मेरा दिदीबहिनी सबै यही काममा छौं ।”

उनले आफ्नो कम्पनीले जर्मनीको निकै लोकप्रिय अन्तर्राष्ट्रिय कम्पनीहरु हेटिच र रेहु ब्रान्डका कम्पनीसँग सहकार्य गरिरहेको जानकारी दिए । उनीहरुले प्राविधिक सहायता उपलब्ध गराइरहेका छन् । रेहुको नेपालमा एक मात्र बितरक आफूहरु रहेको उनको भनाई छ । यो व्यापार मात्र होइन, उनीहरुले नेपालमा तालिमका साथै बिक्री, मार्केटिङ र व्यवसायका बारेमा पनि तालिम दिन्छन्, वैद्य भन्छन् ।

आफ्नो उद्योग अहिले नेपालकै ठूलामध्येको एक फर्निचर उद्योग रहेको गर्वका साथ बताउँदै वैद्य भन्छन्, “मलाई गर्वको अनुभूति हुन्छ । बजारमा केही प्रतिस्पर्धी पनि छन् जसले केही नयाँ गरौं भनेर लागेका छन् । तर डिजाइन, गुणस्तर र नयाँ शैलीका आधारमा हेर्दा हामी अगाडि छौं । हामीसँग अनुभव पनि छ ।”

को हुन् ग्राहक ?

हामीले घर परिवारमा चाहिने बेड, टेबल, किचेन इत्यादिका लागि फर्निचर बनाउँछौं । साथै हामीले ठुल्ठूला कम्पनी, बैंक, कार्यालयहरुका लागि फर्निचर तयार गर्ने र सेट गर्ने गर्छौं । आकर्षक डिजाइन, भरपर्दा अन्तर्राष्ट्रिय जर्मन ब्रान्ड भएकोले पनि हामीलाई ग्राहकले धेरै प्रश्न नै गर्नु पर्दैन । फर्निचरले एउटा व्यक्ति वा कम्पनीको जीवनशैलीलाई झल्काउँछ, र त्यो पूरा गर्न हामी सदैब तत्पर छौं । ग्राहकका रुचि र फर्निचर खरिद गर्ने क्षमतालाई विचार गरेर हामी उचित परामर्श पनि दिन्छौं, डिजाइन गर्दिन्छौं । कतिपय अवस्थामा ग्राहकले आफ्ना डिजाइन पनि सुनाउँछन्, हामी त्यस्तो चाहनालाई पनि सम्बोधन गरिदिन्छौं । हामी नेपाली ग्राहकको क्षमतालाई विचार गरेर सस्ता तर उच्च गुणस्तरका फर्निचर उत्पादन गर्ने सोचमा छौं, वैद्य भन्छन् ।

वैद्य भन्छन्, “मोड्युलर फर्निचरका बारेमा नेपालमा धेरै मानिसलाई थाहा समेत छैन । पश्चिमा मुलुकमा यो सामान्य हो, सबैजसोलाई थाहा छ । तर यहाँ ६० प्रतिशत नेपालीले त मोड्युलर फर्निचर देखेकै छैन, ५० प्रतिशत आर्किटेक्चर डिजाइनरले पनि यसको महत्वबारे बुझेका छैनन् । पार्टिकल र प्लाईउडलाई नै यहाँ नयाँ ठानिन्छ । त्यही कारण मोड्युलर बोर्डका बारेमा धेरैलाई बताउनु छ, थाहा दिनु छ र शिक्षित तुल्याउनु छ ।”