एजेन्सी । बलिउडका बादशाह शाहरुख खान वर्षौंदेखि चेन स्मोकर हुन् । शाहरुख आफैले एक अन्तर्वार्तामा आफू दिनमा १०० चुरोट पिउने गरेको बताएका थिए ।
तर, अब वर्षौंपछि उनले चुरोट छोड्ने निर्णय गरेका छन् । हालै आफ्नो ५९ औं जन्मदिनको विशेष अवसरमा एक कार्यक्रममा सहभागी भएका शाहरुखले फ्यानसँग कुरा गर्दै आफूले चुरोट छोडेको बताए ।
तर, यसका कारण उनी केही स्वास्थ्य समस्या झेलिरहेका छन् । गत शनिबार शाहरुख खान आफ्नो जन्मदिनमा बान्द्राको रंगमन्दिर अडिटोरियममा आयोजित कार्यक्रममा सहभागी भए ।
यही क्रममा उनले स्टेजमा भने, ‘अर्को राम्रो कुरा छ साथीहरू । अब म चुरोट पिउँदिन । शाहरुखको यो कुरा सुनेर प्रेक्षागृहमा रहेका फ्यानहरुको खुसीको सीमा नै रहेन ।
शाहरुखले चुरोट छोडेपछि सास फेर्न समस्या नहोला भन्ने लागेको थियो तर त्यस्तो होइन । उनले भने, ‘मलाई सास फेर्न समस्या नहोला भन्ने लागेको थियो तर अहिले पनि महसुस गरिरहेको छु ।’ केही वर्षअघि शाहरुखले आफ्ना सन्तान आर्यन, सुहाना र अबरामका लागि चुरोट छोड्न चाहेको बताएका थिए ।
