युनाइटेड अरब इमिरेट्स (युएई) मा जारी तेह्रौं संस्करणको इन्डियन प्रिमियर लिग क्रिकेट रोमाञ्चक मोडमा पुगेको छ । मुम्बई इन्डियन्स प्लेअफका लागि छनौट भइसकेको छ भने बाँकी तीन स्थानका लागि चार वटा टिमको दाबेदारीको समीकरण बनेको छ । अंकतालिका हेर्दा आखिरी खेलसम्मबाट मात्र तीन टिमको टुंगो लाग्ने अवस्था बनेको छ ।
अब लिग चरणमा केबल २ खेल बाँकी छन् । मुम्बई १८ अंकका साथ प्लेअफका लागि छनौट भइसकेको छ, तर बाँकी तीन स्थानका लागि चार टिमबीच संघर्ष जारी छ । चार टिमलाई दोस्रो, तेस्रो र चौथो स्थान सुरक्षित गर्ने अवसर छ ।
आइतबारका खेलमा पराजित भएपछि किंग्स इलेभेन पञ्जाब र राजस्थान रोयल्स प्लेअफबाट बाहिरिएका थिए ।
दोस्रो स्थानका लागि आज सोमबार रोयल च्यालेन्जर्स बैंगलोर र दिल्ली क्यापिटल्सबीचको खेलले निर्धारण गर्नेछ । आजको खेलमा दिल्लीले नेपाली बलर सन्दीप लामिछानेलाई मौका देला कि नदेला भन्ने अन्यौल अझै कायम छ ।
हेरौं प्ले अफको सम्भावित तस्वीर
१. मुम्बई इन्डियन्स १८ अंक सहित पहिलो स्थानमा रहने छ । अब मुम्बईले एक खेल खेल्न बाँकी छ ।
२. दिल्ली क्यापिटल्स र रोयल च्यालेन्जर्स बैंगलोरबीच आज सोमबार खेल हुँदैछ । जसले जित्छ ऊ १६ अंक सहित दोस्रो स्थानमा उक्लने छ ।
३. कोलकाता नाइट राइडर्सको १४ अंक सहित टाई हुनेछ ।
४. यदि मुम्बई इन्डियन्सले सनराइजर्स हैदराबादलाई मंगलबार पराजित गरेमा कोलकाता नाइट राइडर्स १४ अंकका साथ दिल्ली क्यापिटल्स वा रोयल च्यालेन्जर्स बैंगलोरबीचको म्याचमा हार्ने टिमको साथमा टाई रहनेछ ।
५. यदि हैदराबादले मंगलबार मुम्बई इन्डियन्सलाई परास्त गरेमा कोलकाता, हैदराबाद र दिल्ली वा बैंगलोरबीच हार्ने टिम समान १४ अंकका साथ टाई रहने छ ।
६. यदि यस्तो परिस्थिति बनेमा हैदराबादको टिम तेस्रो स्थानमा रहने छ किनकी हैदराबादको नेट रनरेट दिल्ली, बैंगलोर र कोलकाताको भन्दा निकै राम्रो छ ।
७. कोलकाताको चाहना आज सोमबारको खेल एकतर्फी रहोस् भन्ने हुनेछ । ताकि जित्ने टिमले सहज रुपमा खेल जित्नेछ । ताकि पराजित हुने टिमको नेट रन रेट कोलकाताको भन्दा खराब हुनेछ ।
८. राजस्थानको टिम सबैभन्दा तल्लो स्थानमा हुनेछ ।
भारतीय संचार माध्यमहरुका अनुसार यस पटकको आइपिएल सबैभन्दा रोमाञ्चक रहेको छ । सबैभन्दा कमजोर अर्थात आठौं स्थानको टिमको पनि १२ अंक छ । अब लिग चरणका २ खेल मात्र बाँकी छन् तर तीन स्थानको छिनोफानो अझै भएको छैन । पञ्जाब, राजस्थान र चेन्नाई प्रतियोगिताबाट बाहिरी सकेका छन् । केही दिन अघिसम्म बैंगलोर र दिल्लीको प्लेअफ पक्कापक्की झैं देखिएको थियो, तर दिल्लीले लगातार ४ खेल हारेसँगै अहिले अंक समीकरण भिन्न छ । अंक मात्र होइन, खूद रन रेटले पनि यसपटक भूमिका खेल्दैछ । (टाइम्स अफ इन्डिया)
अंक तालिका
