एजेन्सी । भारतीय प्रशिक्षक गौतम गम्भीरले केएल राहुलको बचाउ गर्दै टोलीको प्लेइङ–११ सामाजिक सञ्जालबाट तय नहुने बताएका छन् ।
सामाजिक सञ्जाल विशेषज्ञहरूले के सोच्छन् त्यो महत्त्वपूर्ण नरहेको भन्दै व्यवस्थापनले के सोचेको छ त्यो महत्त्वपूर्ण हुने उनको भनाई छ । मुख्य प्रशिक्षकले यो पनि भने कि व्यवस्थापनले केएल राहुललाई समर्थन गर्नेछ ।
अक्टोबर २४ देखि पुणेमा हुने दोस्रो टेष्टअघि गम्भीरले मिडियासँग कुरा गर्दै थिए । उनलाई केएल राहुलको चयनको बारेमा सोधिएको थियो । बेंगलुरु टेस्टको २ इनिङ्समा राहुलले १२ रन मात्र बनाउन सके ।
पहिलो इनिङ्समा उनी शून्य रनमा आउट भएका थिए र भारतीय टोलीले त्यो खेल ८ विकेटले गुमाएको थियो ।
यसपछि सामाजिक सञ्जालमा केएल राहुलको आलोचना भइरहेको छ ।
ऋषभ पन्तको फिटनेसको बारेमा सोधिएको प्रश्नमा गम्भीरले उनी एकदम ठिक रहेको र भोलि विकेटकिपिङ गर्ने बताएका छन् ।
बेंगलुरु टेस्टका क्रममा पन्तको दाहिने घुँडामा बल लागेपछि उनले मैदान छाड्नुपरेको थियो । पन्तको स्थानमा ध्रुव जुरेलले विकेटकिपिङ गरेका थिए ।
न्यूजिल्याण्डसँगको ३ टेस्टको शृङ्खलामा भारतीय टोली १–० ले पछि छ । अक्टोबर १६ यता बेंगलुरुमा भएको पहिलो खेलमा टोली ८ विकेटले पराजित भएको थियो ।
