काठमाडौं । सत्तारुढ नेपाल कम्युनिष्ट पार्टी (नेकपा) भित्रको विवाद अझै रोकिएको छैन । पहिलो र दोस्रो तहका पार्टी नेताहरु चिठी बोकेर यताउता दौडधूप गरे पनि शीर्ष तहमा देखिएको वैमनस्य र अविश्वास अझ फराकिलो बन्दै गएको छ ।
पछिल्लो पटक सचिवालय बैठक डाक्ने विषयमा दुई अध्यक्ष केपी शर्मा ओली र पुष्पकमल दाहाल प्रचण्ड बीच कुनै सहमति जुट्न सकेको छैन । यही मेसोमा कार्यकारी अध्यक्षको हैसियतमा प्रचण्डले मंगलबार अपराह्न बैठक डाक्नु भएको छ ।
तर यो बैठकमा केही दिन अघिको झैं सचिवालयका सबै सदस्यहरु उपस्थित हुने झिनो सम्भावना छ । तैपनि आफूमाथि दबाबको महशुस गर्नु भएका अध्यक्ष प्रचण्डले बैठक डाक्नु भएको बुझिएको छ ।
प्रचण्डले केही दिनअघि पार्टी कार्यालयमा डाक्नु भएको यस्तै बैठक अनौपचारिक भन्दै समाप्त भएको थियो । यस बैठकमा अध्यक्ष प्रचण्ड, वरिष्ट नेता माधव कुमार नेपाल र झलनाथ खनाल, उपाध्यक्ष वामदेव गौतम र पार्टी प्रवक्ता नारायणकाजी श्रेष्ठ मात्र उपस्थित हुनुहुन्थ्यो ।
पार्टी सचिवालयका अन्य सदस्यमा पार्टी अध्यक्ष एवं प्रधानमन्त्री केपी शर्मा ओली, महासचिव विष्णु पौडेल, ईश्वर पोखरेल र गृहमन्त्री रामबहादुर थापा बादल हुनुहुन्छ ।
आज मंगलबार अपराह्न बस्ने गरी तय भएको धुम्बाराही बैठक पनि अनौपचारिक रुपमा नै समाप्त त हुने होइन ? पार्टी अध्यक्ष प्रचण्डका प्रेस संयोजक विष्णु सापकोटा जुगलले औपचारिक बैठक बस्ने या नबस्ने भन्ने बारेमा स्पष्ट भइनसकेको बताउनु भएको छ ।
गत शनिबार नै बहुमत सचिवालय सदस्यका तर्फबाट बैठक बोलाउने बारे पार्टी अध्यक्ष केपी शर्मा ओलीलाई पत्र बुझाइएको थियो । त्यसको जवाफमा अध्यक्ष ओलीले विधान अनुसार बैठक बोलाउन लिखित निर्देशन दिएको बुझिएको छ ।
प्रधानमन्त्री एवं पार्टी अध्यक्ष ओलीले पूर्व सहमति बेगर मन्त्रिपरिषद पुनर्गठन गर्नु भएको, राजनीतिक नियुक्तीका सन्दर्भमा पार्टी नेताहरुसँग परामर्श नगर्नु भएको तथा पार्टी संचालनमा ध्यान नदिनु भएको प्रचण्ड पक्षको भनाई छ ।
