काठमाडौं । डा. गोविन्द केसीले आफ्नो कोरोना संक्रमण उपचार खर्च आफैले बेहोर्ने बताउनुभएको छ । आज मात्रै प्रधानमन्त्री केपी शर्मा ओलीले डा. गोविन्द केसीको सम्पुर्ण कोरोना संक्रमण उपचार खर्च सरकारले गर्ने निर्णय गर्नुभएको थियो । तर डा. गोविन्द केसीले प्रधानमन्त्रीको सो प्रस्तावलाई नकार्दै सरकारले बरु संक्रमित विपन्न र दूरदराजका नागरिक जसलाई निःशुल्क उपचार आवश्यक छ उनीहरुमाथी खर्च गर्न भन्नुभएको छ । प्रम ओलीले आफुलाई दिनुभएको स्वास्थलाभको शुभकामना सन्देशको लागि डा. केसीले हार्दिक धन्यवाद ज्ञापन गर्नुभएको छ ।
डा. गोविन्द केसीको भनाई:-
'म संक्रमित भएपछि प्रम केपी शर्मा ओलीले दिनुभएको स्वास्थलाभको शुभकामना सन्देशको लागि हार्दिक धन्यवाद दिन चाहन्छु। सरकारले मेरो उपचार खर्च बेहोर्छु भनेको सन्दर्भमा भने मेरो उपचार खर्च म आफैँ बेहोर्छु बरु सरकारले आफ्ना नागरिकप्रतिको कर्तव्य पूरा गरोस् । संक्रमित विपन्न र दूरदराजका नागरिक जसलाई निःशुल्क उपचार आवश्यक छ उनीहरुले अहिलेसम्म उपचार पाउन सकेका छैनन् । त्यसो हुनाले अझै पनि सरकारको ध्यान व्यक्ति विशेषको उपचार खर्च बेहोर्नु भन्दा सबै विपन्न नागरिकको उपचार खर्च बेहोर्नेमा हुनुपर्दछ।
हामीसँग पटक पटक गरिएका सम्झौता कार्यन्वयन भएको भए देशका दूरदराजदेखि सबै भेगमा ठूला सरकारी अस्पताल, मेडिकल कलेज बन्ने थिए। साथै, त्यहाँका नागरिकले कोरोना साथसाथै सम्पूर्ण रोगहरुको गुणस्तरीय, निःशुल्क, सर्वसुलभ स्वास्थ सेवा पाउने थिए। तसर्थ हामीसँग १९ औँ सत्याग्रहमा भएका सम्झौता यथाशीघ्र कार्यन्वयन गर्नुहुन अनुरोध गर्दछु। मेरो स्वास्थ्य लाभको कामना गर्नुभएकोमा फेरि पनि तपाईंलाई धन्यवाद दिन चाहन्छु। '
