काठमाडौ । प्रधानमन्त्रीका प्रेस सल्लाहकार सूर्य थापाले अध्यक्ष पुष्पकमल दाहाल प्रचण्डले पार्टी सचिवालयमा पेश गरेको प्रस्ताव अराजनीतिक प्रस्ताव भएको र स्वयंमा अनधिकृत, गैरजिम्मेवार र अनैतिक भएको बताएका छन् । त्यस्तै थापाले उक्त प्रस्ताव प्रचण्डले फिर्ता नगरेसम्म कुनै तहको छलफल र बैठक नै नबस्ने पनि दावी गरेका छन् ।
प्रधानमन्त्रीका प्रेस सल्लाहकार सूर्य थापाको भनाई:-
'अध्यक्ष पुष्पकमल दाहालले पार्टी सचिवालयमा एकल रूपमा मनोमानीपूर्ण ढंगले बाँडेको अराजनीतिक प्रस्ताव स्वयंमा अनधिकृत, गैरजिम्मेवार, अनैतिक, भ्रमको पुलिन्दा र तथ्यको नांगो भ्रष्ट्रीकरण हो । यस्तो लाञ्छनापत्रमाथि कमसेकम पार्टी कमिटीहरूमा छलफल हुनसक्दैन । पार्टी विधान, परम्परा, अभ्यास र दुबैजना अध्यक्षको सहमतिमा मात्रै कुनै पनि प्रस्ताव तयार भएर प्रस्तुत हुने पछिल्लो स्थायी समिति बैठकले समेत गरेको निर्णयको यो ठाडो उल्लंघन हो । यसलाई फिर्ता नगरी नेकपाका कुनै तहका बैठक र छलफल गर्ने त के सम्वाद पनि शत्रुवत् र निरर्थक बन्न पुगेको हुनाले अविलम्ब फिर्ता गरिनुपर्छ । '
नेकपामा भएको लामो रस्साकस्सीपछि हिजो शुक्रवार प्रधानमन्त्री केपी शर्मा ओली सचिवालय बैठक बोलाउन राजी भएका थिए ।
