काठमाडाैंः सत्तारुढ दल नेपाल कम्युनिष्ट पार्टी (नेकपा) भित्र दुई अध्यक्ष केपी ओली र पुष्पकमल दाहाल प्रचण्ड बीच बढ्दै गएको अन्तर संघर्ष साँधुरिने भन्दा पनि झनै बढ्दै गएको छ । गत कार्तिक २८ गते कार्यकारी अध्यक्ष प्रचण्डले अर्का अध्यक्षमाथि संगीन आरोप सहितकाे प्रस्ताव सचिवालयको बैठकमा पेश गरेपछि तरङ्गित बनेको नेकपा भित्रको अन्तरकलह निकै जटिल मोडतर्फ पुगेको छ ।
सचिवालयको बैठक बोलाउन पाँच नेताले लिखित माग गरेको पत्रबाट सुरु भएको पत्रयुद्ध ओलीले पत्रमार्फत नै पाँच नेतालाई जवाफ फर्काउनु भएको थियो । केही समययता एकअर्का प्रति निकै आक्रामक बनेका ओली र प्रचण्ड यतिबेला एकले अर्काको अस्तित्व नै स्वीकार नगर्ने अवस्थामा पुगेका छन् ।
प्रचण्डले कात्तिक २८ गतेको पत्रबाट झनै टाढिएको दुई नेताको सम्बन्धलाई पुनः जोड्नका लागि दोस्राे तहका केही नेताहरू सक्रिय भएपनि त्यसबाट कुनै सकारात्मक छनक आएको छैन । आइतबार मात्र प्रधानमन्त्री तथा अध्यक्ष ओलीले पाँच नेता मध्येका माधव नेपाल र वामदेव गौतमसँग बालुवाटारमा छुट्टाछुट्टै तथा महासचिव विष्णु पौडेल समेत सहभागी भई चार नेता बीच छलफल गर्नु भएको छ । सचिवालयका एक सदस्यका अनुसार अन्य दिनको छलफलमा भन्दा आइतबारको छलफलमा नेता नेपाल र गौतम केही नरम देखिनु भएको थियो ।
उहाँहरुले प्रधानमन्त्री ओलीलाई अर्का अध्यक्ष प्रचण्डले लगाएका आरोपको खण्डन र प्रतिवाद गर्न सुझाव दिनु भएको थियो । स्रोतका अनुसार प्रधानमन्त्रीले खण्डनका लागि आफू तयार रहेको जनाउ दिँदै प्रचण्डले लगाएको आरोपको तथ्यका आधारमा रहेर प्रतिवाद गर्ने र प्रचण्डबाट भएगरेका कामको पनि तथ्य सहित फेहरिस्त सार्वजनिक गर्ने संकेत गर्नु भएको छ । उहाँले जसले मनगढन्ते आरोप लगाउनु भएको छ उहाँका बारेमा पनि तथ्य सहित प्रतिवाद सार्वजनिक किन नगर्ने ?
प्रधानमन्त्रीले नेपाल, गौतम समक्ष कुरा राख्नु भएको थियो । प्रधानमन्त्री ओलीले सहमतिका लागि आफू तयार रहेको तर निरन्तर आफूमाथि हमला भएको भन्दै प्रतिवादका लागि तयार रहेको जनाउनु भएको थियो । प्रधानमन्त्रीले नेपाल र गौतम समक्ष भन्नुभयो, म स्थायी समिति बैठकको निर्णय पूर्ण रुपमा मान्न तयार छु तर यसरी आक्रमण भै रहने हो भने किन मान्ने ?
दुई नेताले एकल तथा सामूहिक छलफलमा पार्टी गम्भीर मोडमा आइपुगेको भन्दै सबैले गम्भीर भएर समीक्षा गर्नुपर्ने बताउनु भएको थियो । स्राेतका अनुसार प्रधानमन्त्री तथा अध्यक्ष ओली ३ गतेको सचिवालयको बैठकलाई रोकेर प्रचण्डको जवाफ पत्र मार्फत नै दिने तयारीमा रहनु भएको छ ।
