काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्ध पक्राउ पुर्जी जारी भएको छ । स्रोतका अनुसार उनलाई पक्राउ गर्न प्रहरी परिचालन गरिएको छ ।
रास्वपा कार्यालयमा भीड जम्मा भइरहेको अवस्थानमा १४ जना शीर्ष नेता भने चीन भ्रमणमा छन् ।
जिल्ला अदालत पोखराका न्यायाधीश कृष्णजंग शाहको इजलासबाट सहकारीमा मुछिएका लामिछानेलाई जरुरी पक्राउ पुर्जी जारी भइसकेको छ । त्यसअघि नै रास्वपाका १४ जना नेताहरू चीन पुगिसकेका छन् ।
सभापतिको पक्राउबारे सूचना आइरहँदा उपसभापति डा. स्वर्णिम वाग्लेको नेतृत्वमा रास्वपाका १४ जना शनिबार चीन पुगेका हुन् ।
वाग्लेको नेतृत्वमा रहेको १४ सदस्यीय टोली शनिबार मध्यराति पौने १२ बजे चाइना साउदर्न एयरलाइन्सको उडान नम्बर सीजेड ३०६८ मा ग्वाङ्चौ गएको हो ।
चीन जानेहरूमा पार्टी प्रवक्ता मनिष झा, पार्टीकी कोषाध्यक्ष लीमा अधिकारी, सांसद शिशिर, खनाल, गणेश पराजुली, अशीम शाह, शिव नेपाली, डा. तोसिमा कार्की छन् ।
त्यसैगरी केन्द्रीय सदस्यहरू बासुमाया तामाङ, निशा मेहता, पुकार बम, प्रकाश विष्ट, तपेश्वर यादव र खुश्बु राजा श्रेष्ठ पनि चीन यात्रामा छन् ।
लामिछानेका भरोसाका रुपमा रहँदै आएका उपसभापति वाग्ले पनि चीनमा रहनु र सहकारी प्रकरणमा छानबिन समिति सदस्य शिशिर खनाल पनि चीन भएपछि रास्वपालाई अहिलेको अवस्थामा सकस परेको छ ।
