एजेन्सी । भारतीय टोलीका पूर्व ब्याटिङ प्रशिक्षक विक्रम राठौरलाई आईपीएल फ्रेन्चाइज राजस्थान रोयल्सले ब्याटिङ प्रशिक्षकमा नियुक्त गरेको छ ।
आईपीएल फ्रेन्चाइजीले आफ्नो आधिकारिक बयानमा ५५ वर्षीय पूर्व भारतीय ओपनर आफ्नो ब्याटिङ कोच हुने जनाएको छ ।
भारतका लागि ६ टेस्ट र ७ ओडीआई खेलेका विक्रम राठौरले रोयल्स परिवारको हिस्सा बन्न पाउनु सौभाग्यको कुरा भएको बताए ।
‘फेरि एकपटक राहुल र अहिले युवा क्रिकेटरसँग काम गर्ने मौका पाएको छु । म टोलीको भिजन र रोयल्सका लागि शीर्ष श्रेणीका खेलाडीहरू सिर्जना गर्न मद्दत गर्नेछु, जसले टोलीलाई आईपीएल विजेता बनाउन मद्दत गर्नेछ ।’ उनले भनेका छन् ।
२०१९ मा भारतको ब्याटिंग कोच बन्नु अघि, राठौरले चार वर्ष राष्ट्रिय चयनकर्ताको रूपमा पनि काम गरे । उनले घरेलु क्रिकेटमा पञ्जाब र हिमाचल प्रदेशलाई पनि प्रशिक्षण दिएका छन् र आईपीएलमा राजस्थान अघि पञ्जाब किंग्ससँग पनि काम गरेका छन् ।
हालै टिम इन्डियाका पूर्व ब्याटिङ कोच विक्रम राठौरलाई न्यूजिल्याण्डको कोचिङ स्टाफमा समावेश गरिएको थियो । न्युजिल्यान्ड क्रिकेट बोर्डले स्थानीय अवस्थालाई ध्यानमा राख्दै ५५ वर्षीय पूर्व भारतीय ओपनर राठौरलाई टोलीमा समावेश गरेको जानकारी दिएको छ । उनीसँगै श्रीलंकाका पूर्व स्पिनर रंगना हेराथलाई स्पिन बलिङ प्रशिक्षकमा नियुक्त गरिएको छ ।
भारतीय क्रिकेट टिमका पूर्व मुख्य प्रशिक्षक राहुल द्रविडलाई केही दिन अघि मात्रै आईपीएल फ्रेन्चाइजी राजस्थान रोयल्सको मुख्य प्रशिक्षक बनाइएको थियो ।
अमेरिका र वेस्ट इन्डिजमा भएको टी–२० विश्वकपमा भारतलाई जित दिलाउन विक्रम राठौरले महत्वपूर्ण भूमिका खेलेका थिए । उनी भारतका ब्याटिङ प्रशिक्षक थिए । उनको कार्यकालमा भारतले धेरै सिरिज जितेको थियो ।
