रसियाले युक्रेनको पोल्टाभामा एक सैनिक शिक्षालयमा गरेको क्षेप्यास्त्र प्रहारबाट कम्तीमा ४९ जनाको मृत्यु भएको छ ।
अन्तर्राष्ट्रिय संचार माध्यमहरुका अनुसार शक्तिशाली क्षेप्यास्त्र प्रहारका कारण २०० भन्दा बढी घाइते भएका युक्रेनको रक्षा मन्त्रालयले जनाएको छ । खोज तथा उद्धार कार्य जारी रहेको छ ।
स्रोतका अनुसार अझै १८ भन्दा बढी व्यक्ति हराइरहेका छन् ।
सैनिक निवास समेत वरपरका कम्तीमा १० वटा घरमा क्षति पुगेको छ । रसियाको कब्जामा रहेको क्राइमिया क्षेत्रबाट पोल्टाभामा क्षेप्यास्त्र प्रहार भएको अनुमान गरिएको छ ।
युक्रेनी राष्ट्रपति भोलोदिमर जेलेन्स्कीले रसियाली क्षेप्यास्त्र आक्रमणलाई निस्तेज बनाउन भरपर्दा र शक्तिशाली हवाई प्रतिरक्षा प्रणाली उपलब्ध गराउन अमेरिका र नेटो सदस्य राष्ट्रहरु समक्ष निरन्तर आवाज उठाइ रहेका छन् ।
अर्कातर्फ राष्ट्रपति जेलेन्स्कीले रसियाली भूमिमा क्षेप्यास्त्रबाट मार हान्ने अनुमतिका लागि पश्चिमा मुलुकसँग आग्रह समेत गरेका छन् । उनीहरुले यस्तो अनुमति नदिए पनि युक्रेनले रसियाको राजधानी मस्कोसम्म ड्रोन आक्रमण गर्न थालेको छ जसले रसियालाई थप आक्रामक हुन उक्साएको अनुमान गरिएको छ । एजेन्सी
