काठमाडौं । प्रमुख प्रतिपक्षी दल नेकपा (माओवादी केन्द्र)को स्थायी कमिटी बैठक सुरु भएको छ ।
पार्टी मुख्यालय पेरिस डाँडामा केहीबेरअघि सुरु भएको बैठकमा आज १४ जना नेताले आफ्नो धारणा राख्ने बताईएको छ । स्थायी कमिटी बैठक भोलि नै समापन गर्ने माओवादीको तयारी छ ।
जारी बैठकमा वर्तमान राजनीतिक परिस्थिति, समाजवादी विचारको विकास, पार्टी निर्माण र भावी योजनाबारे खुलाखुलस्त छलफल भइरहेको छ ।
यसपटक अध्यक्ष दाहालले पार्टीभित्र खुला छलफल गराएका छन् । नेतृत्वको समेत खुलेर आलोचना गरिएको छ । कतिपय नेताले त नेतृत्व परिवर्तनको आवाजसमेत उठाएका छन् ।
प्रचण्डले छिट्टै पार्टीको केन्द्रीय कमिटीको बैठक बोलाउने तयारी गरेको पनि बुझिएको छ ।
