काठमाडौँ । बंगलादेश क्रिकेट टिमका अलराउन्डर शकिब अल हसन आफ्नो क्रोधित बानीका कारण सधैं चर्चामा रहन्छन् । फेरि पनि उनले केही त्यस्तो गरे जसको चर्चा भइरहेको छ ।
शकिबले क्यानडाको जीटी टी–२० लिग खेलेका थिए । उनले यो लिगमा बंगला टाइगर्स मिसिसाउगाको कप्तानी गरेका छन् ।
यस लिगको एक खेलमा शकिबले सुपर ओभर खेल्न अस्वीकार गरेका थिए जसका कारण टोलीले हार बेहोरेको थियो ।
योसँगै उनको टोली यस लिगबाट बाहिरिन पुग्यो । बंगला टाइगर्सले टोरन्टो नेशनल्ससँग खेल खेलेको थियो तर खेल वर्षाले प्रभावित भएको थियो ।
यस्तो अवस्थामा म्याच अफिसियलहरूले सुपर ओभर गरेर खेलको निर्णय गर्न चाहेका थिए जसमा शकिब सहमत भएनन् ।
केही ओभरमा खेलिए पनि सुपर ओभरको सट्टा खेल सञ्चालन गर्न सकिब चाहन्थे । उनको भनाइ स्वीकार भएन र त्यसैले उनी सुपर ओभरमा टस गर्न आएनन् । यस्तो अवस्थामा टोरन्टो टोलीलाई खेलको विजेता घोषित गरियो ।
यदि यो खेल पानीका कारण पूर्णतया वासआउट भए शकिबको टोली अंक तालिकामा टोरन्टोभन्दा अगाडि रहेकोले क्वालिफायरमा पुग्ने थियो ।
यस विषयमा लिगका प्रमुख कार्यकारी अधिकृत जोय भट्टाचार्यले नियमको हिस्सा भएकाले सुपर ओभरबाट खेलको नतिजा निकाल्ने प्रयास भएको बताए ।
वेबसाइट ईएसपीएनक्रिकइन्फोसँग कुरा गर्दै भट्टाचार्यले भने, ‘हामी कुनै न कुनै नतिजा ल्याउने प्रयास गरिरहेका थियौं । तर सुपर ओभर खेल्न नसकेको टोलीका लागि यो दुःखको कुरा हो । यो नियमको हिस्सा थियो ।’
यो पनिः रोहित पौडेल आबद्ध टोरोन्टोले जित्यो ग्लोबल टी–२० लिगको उपाधि
