काठमाडौं । म्यान्चेस्टर सिटीले कम्युनीटि शिल्डको उपाधि जितेको छ ।
शनिबार भएको फाइनल खेलमा शहरी प्रतिद्वन्द्वी म्यान्चेस्टर युनाइटेडलाई पेनाल्टी सुटआउटमा हराउँदै सिटी च्याम्पियन बनेको हो ।
निर्धारित समयसम्म १-१ गोलको बराबरी भएपछि खेल पेनाल्टी सुटआउटमा धकेलिएको थियो । जसमा सिटी ७-६ गोलले विजयी बन्यो ।
खेलको ८२ औं मिनेटमा युनाइटेडका अलेक्जान्डर गर्नाचोले गोल गरेका थिए ।
८९ औ मिनेटमा बर्नार्डो शिल्भाले गोल गर्दै सिटीलाई बराबरीमा ल्याएका थिए ।
प्रीमियर लिगको विजेता र एफए कपको विजेताबीच कम्युनीटि शिल्डका लागि प्रतिस्पर्धा हुने गर्दछ ।
