काठमाडौं । हप्ताको अन्तिम कारोबार दिन बिहीबार नेप्से परिसूचक १ हजार ९६४ दशमलव शून्य २ विन्दुमा पुगेको छ । अघिल्लो कारोबार दिनको तुलनामा ८ दशमलव २७ अंक बढेको हो । यसदिन २०४ ओटा कम्पनीको रू. ४ अर्ब १४ करोड ६३ लाख २१ हजार ५० बराबरको शेयर खरीदविक्री भएको छ । ९८ लाख ८३ हजार १९७ कित्ता शेयर ३९ हजार ४१० पटकमा उक्त रकम बराबरको शेयर खरीदविक्री भएको हो । कारोबारमा आएका १२ ओटा समूहमध्ये जलविद्युत् समूह र विकास बैंक समूहको परिसुचक घटेको छ भने बाँकी समूहको परिसूचक बढेसँगै नेप्से परिसूचक बढेको हो ।
जलविद्युत् समूहको परिसूचक सबैभन्दा बढी ४ दशमलव १३ प्रतिशत घटेको छ । विगत एक दुई दिनदेखि उक्त समूहको परिसूचक बढेको थियो । लगानीकर्ताले प्रोपिट बुक गरेर सेक्टर परिवर्तन गरेसँगै उक्त समूहको परिसूचक घटेको हो ।बुधबार बजार ३९ अंक घटेको थियो र बजार घटेका बेलामा खरीदकर्ता सक्रिय हुँदा बिहीबार बजार बढेको देखिन्छ । बिहीबार सबैभन्दा बढी उत्पादन तथा प्रशोधन समूहको परिसूचक २ दशमलव ६७ प्रतिशत वृद्धि भएको छ । सबैभन्दा बढी लिवर्टी इनर्जी कम्पनीको शेयर मूल्य १० प्रतिशत वृद्धि भएर प्रतिकित्ता रू. २४२ पुगेको छ । त्यसैगरी प्रभु बैंकको संस्थापक शेयर पनि १० प्रतिशतका दरले वृद्धि भएको छ ।
सर्वाधिक करोबार नेपाल लाइफ इन्स्योरेन्स कम्पनीको भएको छ । उक्त कम्पनीको रू. ३७ करोड ३२ लाख बरावरको शेयर खरीदविक्री भएको छ । बिहीबारको कारोबार दिनमा सबैभन्दा बढी अपर तामाकोशी हाइड्रोपावर कम्पनीको शेयर मूूल्य ९ दशमलव ८७ प्रतिशत घटेको छ । दोस्रोमा रसुवागढी जलविद्युत् कम्पनीको शेयर मूल्य ८ दशमलव ६१ प्रतिशत घटेर प्रतिकित्ता रू. ३०८ कायम भएको छ । 
