एजेन्सी । टी–२० सिरिजमा श्रीलंकालाई ३–० ले हराएपछि भारतले आज एकदिवसीय सिरिजको पहिलो खेल खेल्दैछ ।
खेल कोलम्बोको आर प्रेमदासा स्टेडियममा दिउँसो २:४५ बजेबाट सुरु हुनेछ । श्रीलंकाको टोली घाइते मथिश पाथिरानासहित चार प्रमुख फास्ट बलरबिना उत्रनेछ ।
अर्कोतर्फ भारत टी–२० टोलीमा रहेका ६ खेलाडीबिनै उत्रदैछ । कप्तान रोहित शर्मा, विराट कोहली र कुलदीप यादव जस्ता खेलाडी टोलीमा फर्कँदैछन् ।
एकदिवसीय विश्वकपको फाइनलमा अस्ट्रेलियासँग पराजित भएपछि रोहित र विराट दुवैले एकदिवसीय खेल्नेछन् ।
अर्कोतर्फ, ऋषभ पन्त नोभेम्बर २०२२ पछि एकदिवसीय खेल्नेछन् । तर, उनलाई प्लेइङ–११ मा समावेश गर्ने कि नगर्ने भन्ने ठूलो प्रश्न छ ? किनभने केएल राहुल एकदिवसीय टोलीमा पहिलो रोजाइको विकेटकिपरका रूपमा स्थापित भएका छन् ।
भारतसँग आज श्रीलंका विरुद्ध आफ्नो १०० औं ओडीआई जित दर्ता गर्ने मौका छ । यी दुईबीच १६८ एकदिवसीय खेल भएको थियो, जसमा भारतले ९९ र श्रीलंकाले ५७ जित हासिल गरेको थियो । यस्तै, १ ओडीआई बराबरी भएको थियो भने ११ खेल अनिर्णित रह्यो ।
२०१४ यता भारतले २५ ओडीआई मध्ये २१ मा श्रीलंकालाई हराएको छ । श्रीलंकाले मात्र ४ खेलमा जित निकालेको थियो ।
