काठमाडौं: युक्रेन मामिलामा रुस र अमेरिकाबीच तिक्तता बढेकै समयमा दुबै देश सातवटा मुलुकमा बन्दी जीवन बिताइरहेका व्यक्तिहरुलाइ छाड्न सहमत भएका छन् ।
यी बन्दीहरु रुस, अमेरिका, जर्मनी, पोल्यान्ड, स्लोभेनिया, नर्वे र बेलारुसमा रहेका छन् । खासगरी युरोपका विभिन्न जेलमा थुनामा रहेका रुसका नागरिकहरु रुसी गुप्तचर निकाय (एफएसबी) सँग आबद्ध रहेको बताइएको छ ।
बिबिसीका अनुसार युरोपका जेलमा बन्दी अवस्थामा रहेका आठ जना रूसी नागरिक जेलमुक्त भएर रुस जाँदैछन् ।
पछिल्लो सहमतिसँगै रसियामा थुनामा रहेका वाल स्ट्रिट जर्नलका संवाददाता इभान गर्सकोभिच, अमेरिकी सैनिक पल ह्विलान र रुसी र अमेरिकी दुबै देशको नागरिक रहेकी रेडियो पत्रकार अल्सु कुर्मासेभा जेलमुक्त हुनेछन् ।
उनीहरुलाई लिएर एउटा रुसी बिमान टर्कीको राजधानी अंकारा पुगिसकेको अन्तर्राष्ट्रिय संचार माध्यमहरुले जनाएका छन् । यस्तै रुसले पुटिनका आलोचक इल्या यासिनलाई पनि मुक्त गर्दैछ ।
जर्मनीले आफ्नो जेलमा रहेका रसियाली नागरिक भादिम क्रासिकोभलाई रिहा गरेको छ । उनी सन् २०१९ मा जर्मनीको बर्लिन पार्कमा रसियाका विपक्षी एक नेताको हत्यामा संलग्न रहेको आरोपमा जर्मनीमा बन्दी थिए ।
अमेरिका र रुस बीच शीतयुद्धकाल पछि सबैभन्दा ठूलो संख्यामा बन्दी आदानप्रदान गर्न सहमत भएका हुन् । यद्यपी अहिले दुबै मुलुकबीच सम्बन्ध सुध्रिएका कारण बन्दी आदानप्रदान भएको होइन ।
केही समयदेखि दुबै मुलुकका अधिकारीहरु बन्दी आदानप्रदानका लागि प्रयासरत थिए । तर आज आश्चर्यजनक परिणाम देखिएको छ । एजेन्सी
