![](https://newspolar.com/wp-content/uploads/2024/07/cricket.jpg)
काठमाडौँ । अन्तर्राष्ट्रिय क्रिकेट परिषद् (आईसीसी)को बोर्ड बैठकले महिला तथा पुरुष विश्वकप क्रिकेटको छनोट प्रतियोगितामा केही परिवर्तन गरेको छ ।
आईसीसीले गरेको उक्त निर्णयले विश्वकपमा पुग्न नेपाललाई केही सहज हुने देखिन्छ ।
बैठकले सन् २०२६ मा हुने आईसीसी पुरुष टी–२० विश्वकपका लागि क्षेत्रीय छनोटबाट विश्वकप पुग्ने ८ टोलीको छनोट प्रक्रियामा परिवर्तन गरेको छ ।
जसअनुसार अब युरोप र अफ्रीकाबाट २–२, अमेरिकाबाट १ तथा एसिया र इस्ट एसिया प्यासिफिक (इएपी)क्षेत्रबाट ३ टोली छनोट हुनेछन् ।
यसअघि एसियाबाट २ र इएपीबाट १ टोली छनोट हुँदै आएको थियो । एसियाबाट विश्वकपमा पुग्न नेपाल, ओमान, यूएई र हङकङ मुख्य दाबेदार रहँदै आएकामा तीन टोली हुँदा नेपाललाई केही सहज हुने भएको छ ।
महिलातर्फ पनि आईसीसीले विश्वकपमा सहभागी हुने टोलीको सङ्ख्या बढाएको छ ।
सन् २०३० को विश्वकपदेखि सहभागी टोलीलाई १२ बाट १६ पुर्याइएको छ । नेपालको महिला टोलीले अहिलेसम्म विश्वकपमा स्थान बनाउन सकेको छैन ।