एजेन्सी । पाकिस्तान क्रिकेट बोर्ड (पीसीबी)ले बाबर आजम, मोहम्मद रिजवान र शाहीन शाह अफ्रिदीलाई ग्लोबल टी–२० क्यानडा लिगमा सहभागी हुन नो अब्जेक्सन सर्टिफिकेट (एनओसी) दिन अस्वीकार गरेको छ ।
ग्लोबल टी–२० क्यानडा लिग जुलाई २५ देखि अगस्ट ११ सम्म आयोजना हुँदैछ । लिगको तालिका पाकिस्तानको कुनै शृङ्खला वा खेलसँग बाझिएको छैन ।
तर पनि खेलाडीले एनओसी पाउने छैनन् । यसअघि नसिम शाहलाई पनि द हन्ड्रेडमा सहभागी हुन एनओसी दिइएको थिएन । अगस्ट २०२४ देखि मार्च २०२५ सम्मको पाकिस्तानको व्यस्त क्रिकेट क्यालेन्डरलाई ध्यानमा राख्दै बोर्डले यो निर्णय गरेको हो ।
प्रेस विज्ञप्ति जारी गर्दै पीसीबीले बोर्डले ग्लोबल टी–२० प्रतियोगिताका लागि बाबर आजम, मोहम्मद रिजवान र शाहीन अफ्रिदीलगायत अन्य खेलाडीहरूबाट एनओसी अनुरोध प्राप्त गरेको जनाएको छ ।
अगस्ट २०२४ र मार्च २०२५ को बीचमा पाकिस्तानको व्यस्त क्रिकेट क्यालेन्डरलाई ध्यानमा राख्दै र तीनै खेलाडी र राष्ट्रिय चयन समितिसँगको परामर्शपछि बोर्डले उनीहरूको अनुरोध अस्वीकार गर्ने निर्णय गरेको हो ।
तीनैजना सबै ढाँचाका क्रिकेटर हुन् र उनीहरूको सेवा आगामी आठ महिनामा आवश्यक हुने अपेक्षा गरिएको छ, जसमा पाकिस्तानले ९ टेस्ट, १४ एकदिवसीय र नौ टी–२० खेल खेल्नेछ ।
