काठमाडौं । दुई प्रतिपक्षदलले संघीय संसदको अधिवेशन तत्काल बोलाउन सरकारसँग माग गरेका छन् । प्रमुख प्रतिपक्षदल नेपाली कांग्रेस र अर्को बिपक्षीदल जनता समाजबादी पार्टी (जसपा)का शिर्षनेताहरु बीच सनिबार भएको छलफल पछि संसदको बैठक तत्काल बोलाउन माग गरेका हुन् ।
प्रमुख प्रतिपक्षदल नेपाली कांग्रेसका सभापति शेरबहादुर देउवाको निवास बुढानीलकण्ठमा भएको दुई दलका नेताहरुले छलफलले लोकतन्त्रको रक्षा, भ्रष्टाचार, कोभिड–१९ को विविध पक्ष, आर्थिक संकट लगायतका जनसरोकारका विषयमा संसदमा भएका प्रतिपक्षी दलहरूबीच सहकार्य गरेर अगाडि बढ्ने निर्णय समेत गरेका छन् ।
छलफलमा काँग्रेस सभापति देउवा, वरिष्ठ नेता रामचन्द्र पौडेल र केन्द्रीय सदस्यद्वय डा. मीनेन्द्र रिजाल र रमेश लेखक तथा जसपाबाट अध्यक्ष महन्थ ठाकुर र संघीय परिषद् अध्यक्ष डा। बाबुराम भट्टराई र वरिष्ठ नेता राजेन्द्र महतो सहभागी हुनु भएको थियो ।
