काठमाडैँ । एसीसी महिला एसिया कप क्रिकेट प्रतियोगिताको अन्तिम अभ्यास खेलमा नेपालले जित निकालेको छ ।
नेपालले श्रीलङ्का डेभलपमेन्टलाई २ रनले पराजित गरेको हो । अघिल्ला दुई खेलमा लगातार पराजित भएको नेपालले अन्तिम खेलमा भने रोचक जित निकाल्यो ।
सुरुमा ब्याटिङ गरेको नेपाली टोलीले निर्धारित २० ओभरमा ६ विकेट गुमाएर ११२ रन बनाएको थियो । नेपालका लागि रुविना क्षेत्रीले सर्वाधिक ३७ रन बनाइन् भने बिन्दु रावलले २० रनको योगदान दिइन् ।
११३ रनको लक्ष्य पछ्याएको श्रीलङ्का डेभलपमेन्टका लागि भी बालासूर्याले सर्वाधिक ३८ रन जोडिन् भने आर नेथ्रान्जलीले २६ रन बनाइन् । श्रीलङ्का एक बल खेल्न बाँकी हुँदा अलआउट भएको थियो ।
नेपालका लागि कविता जोशीले तीन विकेट लिइन् भने कृतिका मरासिनीले दुई विकेट हात पारिन् ।
नेपालले साउन ४ गते यूएईविरुद्ध एसिया कपको पहिलो खेल खेल्नेछ । नेपाल रहेको समूह ‘ए’ मा यूएईसँगै भारत र पाकिस्तान छन् । एसिया कप साउन ४ गतेदेखि १३ गतेसम्म सञ्चालन हुनेछ ।
समूह ‘बी’ मा भने श्रीलङ्का, बङ्गलादेश, मलेसिया र थाइल्यान्ड छन् । समूह चरणबाट दुई–दुई टोली सेमिफाइनल पुग्नेछन् ।
