![](https://newspolar.com/wp-content/uploads/2024/07/giroud.jpg)
एजेन्सी । फ्रान्सको राष्ट्रिय फुटबल टोलीका स्टाइकर ओलिभर जिरुडले अन्तर्राष्ट्रिय खेलबाट सन्यास लिएका छन् ।
जिरुडले इन्स्टाग्राममा एक सन्देश लेख्दै सन्यासको घोषणा गरेका हुन् ।
१३ वर्षसम्म राष्ट्रिय टोलीबाट खेलेका उनले लेखेका छन्, ‘फ्रेन्च राष्ट्रिय टोलीबाट बिदाइ लिने क्षण निकै डरलाग्दो छ । म १३ वर्षसम्म टोलीको हिस्सा रहेँ । त्यो मेरो हृदयमा सधैं रहिरहने छ । यो सबैभन्दा ठूलो गर्व र मेरो सबैभन्दा प्रिय स्मृति हो ।’
उनी फ्रान्सका उच्च गोलकर्तासमेत हुन् । जिरुडले राष्ट्रिय टोलीबाट १ सय ३७ खेलमा ५७ गोल गरेका छन् ।
फ्रान्सले सन् २०१८ को विश्वकप जित्दा जिरुड टोलीका महत्वपूर्ण सदस्य थिए । उनले गत मेमा युरोपियन च्याम्पियनसिप आफ्नो अन्तिम अन्तर्राष्ट्रिय प्रतियोगिता हुने बताएका थिए ।
हालै सम्पन्न प्रतियोगितामा जिरुडले वैकल्पिक खेलाडीका रूपमा चार खेलमा अवसर पाए । तर, फ्रान्सको यात्रा सेमिफाइनलसम्म रह्यो ।
जिरुडले सन् २०११ मा अमेरिकाविरुद्धको मैत्रीपूर्ण खेलमार्फत सिनियर टोलीका लागि डेब्यू गरेका थिए ।