काठमाडौं । ईंग्ल्याण्ड युरो कप २०२४ फुटबल प्रतियोगिताको फाइनलमा प्रवेश गरेको छ ।
भर्खरै सम्पन्न खेलमा नेदरल्यान्ड्सलाई २-१ गोलले हराउँदै ईंग्ल्याण्ड फाइनलमा पुगेको हो ।
खेलको ७ औं मिनेटमा नेदरल्यान्ड्सले ज्याभी सिमोन्सको गोलबाट अग्रता लियो । सिमोन्सले डिबक्स बाहिरबाट सुन्दर गोल गरे ।
१८ औं मिनेटमा ह्यारी केनको पेनाल्टी गोलबाट ईंग्लिश टोलीले खेल बराबरी गर्यो । नेदरल्यान्ड्सका डेन्जेल डुम्फ्रीसले डिबक्सभित्र ह्यारी केनमाथी खराब ट्याकल गरेपछि ईंग्ल्याण्डले पेनाल्टी पाएको हो ।
२२ औं मिनेटमा नेदरल्यान्ड्सका डुम्फ्रीसले फिल फोडेनले प्रहार गरेको बललाई गोल हुन दिएनन् । डुम्फ्रीसले गोललाइनमा बल रोक्न पुगे ।
खेलको ३० औं मिनेटमा नेदरल्यान्ड्सका डुम्फ्रीसले कर्नरबाट आएको पासलाई हेडरमार्फत प्रहार गर्दा पोस्ट बारमा लागेर बल बाहिरिन पुग्यो ।
खेलको ६५ औं मिनेटमा नेदरल्यान्ड्सका भर्जिल भान डाइकले प्रहार गरेको बललाई ईंग्ल्याण्डका गोलकिपर पिकफोर्डले उत्कृष्ट बचाउ गरे ।
८० औं मिनेटमा ईंग्ल्याण्डका बुकायो साकाले गोल गरेपनि उनी अफसाइड हुन पुगे र गोलले मान्यता पाएन ।
९० औं मिनेटमा वैकल्पिक खेलाडी ओली वाट्कीन्सले गोल गर्दै ईंग्ल्याण्डलाई २-१ को जितसहित फाइनलमा पुर्याए ।
अब ईंग्ल्याण्डले उपाधिका लागी स्पेनसँग प्रतिस्पर्धा गर्नेछ । फाइनल खेल आइतबार मध्यराती १२:४५ बजे हुनेछ ।
