एजेन्सी । भारतीय टोली टी–२० विश्वकपको फाइनलमा प्रवेश गरेको छ । भारत तेस्रो पटक टी–२० विश्वकपको फाइनलमा पुगेको हो ।
बिहीबार भएको दोस्रो सेमिफाइनल खेलमा डिफेन्डिङ च्याम्पियन इंग्ल्यान्डलाई ६८ रनले पराजित गर्दै भारत फाइनलमा पुगेको हो ।
योसँगै रोहित शर्मा ४९ खेल जितेर विश्वकै सर्वाधिक सफल टी–२० कप्तान बनेका छन् । उनले पाकिस्तानका बाबर आजम (४८ जित)लाई पछाडि छोडे ।
गुयानाको प्रोभिडेन्स स्टेडियममा बिहीबार भएको खेलमा भारतले २० ओभरमा ७ विकेट गुमाएर १७१ रन बनाएपछि इंग्लिस टोली १६.४ ओभरमा १०३ रनमा अलआउट भयो ।
यो खेलमा भारतीय कप्तान रोहित शर्माले ३९ बलमा ५७ रनको इनिङ खेले । उनले ४ चौका र २ छक्का प्रहार गरे । रोहितले १४६.१५ को स्ट्राइक रेटमा ब्याटिङ गरे । रोहित टी–२० विश्वकपमा सर्वाधिक चौका प्रहार गर्ने ब्याट्सम्यान बनेका छन् । यति मात्र होइन, उनी आईसीसी प्रतियोगिताको नकआउट खेलका शीर्ष ६ हिटर पनि बनेका छन् ।
रोहितको नाममा ११३ चौका छन् । उनले श्रीलंकाका पूर्व ब्याट्सम्यान महेला जयवर्धनेको कीर्तिमान तोडेका छन् । यस प्रतियोगितामा जयवर्धनेको नाममा १११ चौका छन् । यो लिस्टमा तेस्रो नाम विराट कोहलीको छ । कोहलीले टी–२० विश्वकपमा १०५ चौका प्रहार गरेका छन् ।
