काठमाडौं। अघिल्लो साताको आइतबार ठीक १० दिनअघि संसद विघटन गरेका प्रधानमन्त्री तथा नेकपाका अध्यक्ष केपी ओलीलाई आज नेकपाकै (प्रचण्ड–माधव) पक्षका नेतात्रयले गणतन्त्र विरोधी भनेर आरोप लगाएका छन् । यतिमात्र होइन नेकपा विभाजन हुनुअघि पनि ओली इतरको समूहमा रहेका तीन नेताले आज ओलीलाई संविधानलाई नै बलात्कार गरेको सम्मको आरोप लगाएका थिए ।
आज भृकुटीमण्डमा आमसभा गरेर उनीहरुले बालुवाटार तिर फर्केर भने, यदि ओलीले विघटन गरेको संसद पुनस्र्थापना नगर्ने हो भने देशमा आँधी आउन सक्छ । उनीहरुले वैशाखमा चुनाव नहुने भन्दै चुनाव हुने भ्रम नपाल्न पनि ओली र उनको समूहका सबै नेता कार्यकर्ताहरुलाई चेतावनी दिएका थिए।
संसद् विघटनविरुद्ध राजधानी काँठमाडौंमा मंगलबार आयोजना गरिएको विरोधसभामा अध्यक्ष पुष्पकमल दाहाल प्रचण्ड, अर्का अध्यक्ष माधवकुमार नेपाल र वरिष्ठ नेता झलनाथ खनालले नेकपाको स्पष्ट बहुमत रहेको छँदाखाँदाको संसद यसको कम्तीमा पनि दुई वर्ष कार्यकाल बाँकी छँदै विघटन गर्नु ओलीको घोर दक्षिणपन्थी काम भएको बताएका थिए ।
उनीहरुले अहिले नै दुई तिहाइ बहुमत निकटको संसद् विघटन गर्ने प्रधानमन्त्री केपी शर्मा ओलीले वैशखमा चुनाव गराउँछन् भन्नेमा कुनै पनि विश्वास नगर्न नेकपाका नेता कार्यकर्ताहरु मात्र होइन कि प्रमुख विपक्षी दल नेपाली काँग्रेसलाई पनि सचेत गराएका थिए ।
उनीहरुको आलोचनाको मुख्य पात्र प्रधानमन्त्री नै थिए । तीनै जना नेताले प्रधानमन्त्री केपी शर्मा ओलीको आलोचनामा समय खर्चिएका उनीहरुले प्रधानमन्त्री ओलीकै कारण देश भड्खालोमा फसको भन्दै ओलीले गरेको गल्ती सच्याउन दबाब दिने उद्देश्यले सडकमा आएको बताए ।
अध्यक्ष प्रचण्डले यदि संसद पुनस्र्थापना नगर्ने हो भने अर्को चरणको विरोधका कार्यक्रमको सामना गर्न प्रधानमन्त्री ओलीलाई चेतावनी दिए । उनले त्यसका लागि तयार रहनसमेत प्रधानमन्त्री ओलीलाई चेतावनी दिएका छन्। वैशाखमा चुनाव पनि नहुने र वैशाखपछि ओली पनि प्रधानमन्त्री नरहने उनीहरुले बताएका थिए ।
सो समूहका अध्यक्ष माधवकुमार नेपालले प्रतिनिधिसभाको विघटन आफूहरुलाई स्वीकार्य नहुने बताए। उनले संविधानको भावना विपरीत गरिएको प्रतिनिधिसभा विघटनको कदम कुनै पनि हालतमा स्वीकार्य छैन भने ।
अर्का वरिष्ठ नेता झलनाथ खनालले जननिर्वाचित संस्था विघटन गरेर सरकारले मुलुकमा अस्थिरता सिर्जना गर्न खोजेको आरोप लगाए। ‘मुलुकको समृद्धिको बाधक नै ओली रहेको बताएका थिए ।
सो विरोध सभामा तिनै जना नेताको एक स्वर थियो, विघटित संसद पुनस्र्थापना नभए देशमा आँधी आउँछ, आन्दोलनको आँधीबेहरी आउँछ, त्यसलाई कसैले रोक्न र छेक्न सक्दैन ।
